11:49 / E Premte, 08 Nëntor 2019

Ali Ahmeti, Kadri Veselit: Kështu paska e qenë e shkruar, jo nga Zoti, po nga hasmi

Politikani shqiptar në Maqedoninë e Veriut, Ali Ahmeti pas ftesës së Gjykatës Speciale për intervistim të kryetarit të PDK-së, Kadri Veseli, ka thënë se kështu ka qenë e shkruar, jo nga Perendia, por nga hasmi, shkruan Indeksonline.

Ahmeti ka thënë se kjo është padrejtësi dhe se Veseli do të ngadhënjejë siç ngadhnjyem në luftën tonë të drejtë.

Postimi i plotë:

I dashur vëlla Kadri, bashkëveprimtar, bashkëluftëtar, bashkëmendimtar, shoqërues dhe bashkëndërtues i rrugës sonë të përbashkët për liri, pavarësi, demokraci.

Na paska qenë e shkruar, jo nga Perendia, por nga hasmi, ai i dituri dhe ai i strukuri, që çdo ditë të lume ta dëshmojmë pastërtinë dhe dinjitetin e luftës tonë çlirimtare nga zgjedha e kasapit të Ballkanit.

E nga Perendia na qenka përcaktuar detyrimi që t’i bëjmë ballë shpifjeve, denigrimeve, nënçmimit, propagandës dhe lajmeve të rreme nga ai i dituri edhe ai i strukuri në mënyrë që ta mbrojmë dinjitetin e luftës, e çdo pike gjak të derdhur, e çdo plage, të secilit dëshmor, martir dhe invalid, të çdo istikame, të çdonjërës shkrepje, të secilit lot të derdhur nga sytë e nënave tona.

E di që edhe ti, si edhe unë, edhe një jetë po ta kishim, do ta bënim të njejtën, pa ndryshuar pikë as presje, pa na u dridhur qerpiku, e as pa u menduar as edhe një herë të vetme.

Kjo është padrejtësi, por ti do të ngadhnjesh ndaj saj ashtu siç bashkë ngadhnjyem në luftën tonë të drejtë.