Ankesa në shërbimet shëndetësore, kërkesë për mbylljen e njësisë së paraburgimit në Dubravë, por çfarë thonë organet kompetente?

Ditë më parë KMDLNJ ka kërkuar që Pavijoni i Paraburgimit në Qendrën Korrektuese në Dubravë duhet të mbyllet urgjentisht.

Në këtë qendër thuhet se përafërsisht janë 35 deri 40 të paraburgosur që i shkakton shumë probleme këtij institucioni korrektues, si gjatë përcjelljes së shpeshta në seanca gjyqësore ashtu edhe gjatë dërgimit në spitale rajonale dhe në QKUK.

KMDLNj ka pasur vërejtje edhe për Shërbimin Shëndetësor të Burgjeve që sipas tyre përkundër përpjekjeve të vazhdueshme, asnjëherë për shkaqe objektive apo subjektive nuk ka arritur t’i plotësojë kërkesat dhe nevojat e personave të privuar nga liria për një trajtim shëndetësorë që parashihet me standardet ndërkombëtare .

Lidhur me këtë Indeksonline ka kontaktuar Florent Gashin nga Drejtoria e Përgjithshme e Shërbimeve Korrektuese të Kosovës.

Sipas Gashit, aktualisht Pavijoni i Paraburgimit në Dubravë plotëson kushtet për mbarëvajtjen e personave të paraburgosur.

“SHKK, Pavijonin e lartcekur e përdorë vetëm në rastet kur nuk ka hapësirë të mjaftueshme  në pavijonet tjera. Me rritjen e kapaciteteve në qendrat e paraburgimit në Gjilan dhe Prishtinë, pavijoni në fjalë do të destinohet për kategori tjera të të burgosurve”, tha Gashi.

E nga Ministria e Shëndetësisë kanë deklaruar se KMDLNJ ka pasur vërejtje për mungesë të Spitalit të Burgjeve dhe vështirësi në trajtimin e disa rasteve vështirë të menaxhueshme.

Madje të njëjtit mohuan që KMDLNJ të ketë deklaruar se ‘për shkaqe objektive apo  subjektive nuk është arritur të plotësohen kërkesat dhe nevojat e personave të privuar nga liria për trajtim shëndetësor që parashihet me standardet ndërkombëtarë’.

“Ministria e Shëndetësisë, përmes Departamentit Shëndetësor të Burgjeve dhe Njësive Shëndetësore të Burgjeve, ofron shërbime shëndetësore ekuivalente me atë të sektorit publik. Të gjitha shërbimet të cilat nuk mund të kryhen në këto njësi, referohen ne spitalet e përgjithshme dhe në ShSKUK për trajtim specifik. Kjo çështje është rregulluar edhe me UA 05/2014 të QRK mbi funksionimin e shërbimeve shëndetësor te burgjeve”, u tha nga Zyra për Informim e MSh-së për Indeksonline.

Tutje të njëjtit kanë deklaruar se sa i takon standardeve ndërkombëtare shëndetësore në burgje, ato janë të harmonizuara në plotni me Rekomandime të Këshillit të Evropës dhe Rregullat evropiane të Burgjeve.

“Lidhur me kushtet dhe standardet që ofrohen ne Njësit Shëndetësor të Burgjeve, ky shërbim funksion sipas Protokollit për hapësira, pajisje dhe kushte të punës të harmonizuara me ato të MSh-së për Institucionet Private në vend. Të gjitha njësit i kanë të gjitha këto hapësirë, pajisje dhe shërbime konform standardeve te vendit, te verifikuara nga Inspektoratet relevante te MSh-së”, u tha nga MSh.

Sipas tyre furnizimi me barëra është 100% sipas listës së barërave, më 701 artikull dhe e cila i mbulon të gjitha shërbimet e nevojshme.

“Furnizimi është stabil, buxheti i alokuar për këtë çështje, kontratat afatgjata. Në të gjitha NjShB ka shërbim infermierie 24 orësh, çka nuk ka as ne vendet e BE-së. Ka mjek çdo ditë punë, ka shërbim psikologjik, stomatologjik dhe psikiatrik të përhershëm. Ne dy njësi ka mjek 24 oresh sipas specifikave te shërbimeve. Këto shërbime mbulohen me staf prej profesionistësh shëndetësorë. Për shërbime të tjera specialistike janë të kontraktuar edhe 16 konsultant të cilët i vizitojnë njësit sipas nevojës, së paku një here në javë”, u tha tutje nga MSh.

Sipas të njëjtëve të gjitha shërbimet në ShSKUK për të burgosurit kryhen pa listë të pritjes, por në çdo kohë./Indeksonline/