Arrestohet shoferi që shkaktoi aksidentin me fatalitet në Nabërgjan të Pejës

Policia ka arrestuar shoferin e njërës nga veturat e përfshira në aksidentin tragjik që ndodhi një ditë më parë në fshatin Nabërgjan të Pejës, ku një person humbi jetën dhe tre të tjerë mbetën të lënduar, transmeton portali IndeksOnline.

Aksidenti ndodhi më 9 korrik rreth orës 13:00, kur dy vetura u përplasën mes vete. Për pasojë, një person nuk arriti t’u mbijetojë plagëve dhe ndërroi jetë në vendin e ngjarjes, ndërsa tre persona të tjerë u dërguan në spital për trajtim mjekësor.

Në vendin e aksidentit ka dalë edhe prokurori i rastit, i cili ka urdhëruar që trupi i pajetë të dërgohet në Institutin e Mjekësisë Ligjore për obduksion. Ndërkohë, shoferi i përfshirë në aksident është arrestuar dhe ndodhet në ndalim, përderisa po zhvillohen hetimet për zbardhjen e plotë të shkaqeve dhe përgjegjësive.

Policia ka konfirmuar se rasti është cilësuar si “Aksident trafiku me fatalitet” dhe se hetimet po vazhdojnë në koordinim me Prokurorinë Themelore në Pejë./IndeksOnline/