“Bonnie & Bonnie”, histori dashurie mes një shqiptareje dhe një gjermaneje

“Këtu rrëfehet me shumë pasion, me shumë sensualitet dhe shumë natyrshëm – diçka të tillë ka tepër rrallë në kinemanë gjermane”

“Bonnie & Bonnie” mban emrin filmi gjerman, në qendër të të cilit është një vajzë shqiptare, e dashuruar me një moshatare të saj gjermane. Emri i filmit asocionon me filmin e njohur hollivudian “Bonnie & Klyde”, ndërsa të përbashkët me të ka faktin se protagonistet edhe këtu janë nga bota e krimit.

Dy vajza që vijnë nga kultura të ndryshme dashurohen në njëra-tjetrën: një NO-GO, të paktën për familjen shqiptare të njërës prej tyre, shkruan mdr.de. Rrëfimi i tyre shndërrohet në një Roadmovie emocionues mbi dashurinë lezbike, çfarë në Gjermani nuk ka pasur ndonjëherë më parë, shkruan kritiku i filmit në televizionin MDR, Knut Elstermann.

Shqiptarja 16 vjeçe Yara (rolin e saj e luan Emma Drogunova) dhe gjermanja 18 vjeçe Kiki (Sara Mahita) dashurohen “përjetësisht) në njëra-tjetrën. Kiki ka një të kaluar kriminale, ndërsa Yara ndihet e shtrënguar nga familja e saj, transmeton albinfo.ch. Dashuria i jep siguri, edhe pse familja e saj shqiptare nuk bën të kuptojë asgjë nga kjo. Ndërkohë babai i Yara-s ka zgjedhur tashmë një dhëndër për të, ndërsa vëllai i saj ia ka vënë syrin Kikit.

Në këto rrethana, ajo që u mbetet dy vajzave të reja është arratisja nga rrethimi i padurueshëm armiqësor. Një arratisje e  financuar nga vjedhjet.

Ato duan ta gjejnë motrën e Kikit e cila jeton diku në Francën jugore, përcjell albinfo.ch. Historia e tyre e dashurisë, e luajtur për mrekulli, këtu rrëfehet me shumë pasion, me shumë sensualitet dhe shumë natyrshëm – diçka të tillë ka tepër rrallë në kinemanë gjermane.

Regjisori Ali Hakim është rritur në Hamburg-Wilhelmsburg. Po aty ai e ka vendosur dhe rrëfimin e tij të bukur me aktorë shumë bindës dhe me një stil të shpejtë e që të bën për vete.