CAS vendos në favor të FFK-së, konfirmohet moslicencimi i FC Prishtinës!

Gjykata e Arbitrazhit Sportiv në Lozanë, Court of Arbitration for Sport, ka vendosur në favor të Federata e Futbollit e Kosovës në çështjen që lidhej me moslicencimin e FC Prishtina për pjesëmarrje në garat evropiane për sezonin 2023/24.

Sipas njoftimit të FFK-së, CAS ka vërtetuar se vendimi për moslicencimin e klubit kryeqytetas ishte në përputhje me rregulloret në fuqi, duke i dhënë legjitimitet të plotë procedurave dhe vendimmarrjes së federatës.

Një nga pikat kyçe të vendimit është konfirmimi se Gjykata e Arbitrazhit Sportiv e Kosovës nuk kishte juridiksion për të shqyrtuar ankesën ndaj vendimit të Organit të Apelit për Licencim të FFK-së. Paneli i CAS-it ka theksuar se, bazuar në Statutin e FFK-së dhe rregulloret e UEFA-s për licencimin e klubeve, vendimet e shkallës së dytë mund të kundërshtohen vetëm në CAS në Lozanë.

Në arsyetimin e tij, CAS ka theksuar gjithashtu se FC Prishtina ishte informuar në kohë dhe në mënyrë të qartë për procedurat e ankesës dhe për faktin se shkalla e tretë e apelimit ishte pikërisht gjykata ndërkombëtare në Zvicër.

FFK e ka cilësuar vendimin si një fitore të rëndësishme juridike dhe institucionale, duke theksuar se ai riafirmon autonominë e federatës dhe respektimin e standardeve të përcaktuara nga FIFA dhe UEFA.

Sipas federatës, ky vendim krijon një precedent të rëndësishëm për futbollin kosovar dhe forcon parimin se çështjet e licencimit duhet të trajtohen në përputhje me hierarkinë institucionale dhe rregulloret ndërkombëtare të futbollit./Indeksonline/