Cruz Beckham thumbon publikisht Brooklyn mes përçarjes familjare
Përçarja brenda familjes Beckham duket se vazhdon të thellohet. Cruz Beckham ka hedhur një thumb ndaj vëllait të tij, Brooklyn Beckham, gjatë ndeshjes së Kupës së Botës mes Anglisë dhe Ganës në Boston, ku ishte i pranishëm së bashku me babanë e tij, David Beckham.
Në një postim në Instagram Stories, Cruz publikoi një foto ku shihej duke parë telefonin gjatë ndeshjes, ndërsa David Beckham ishte i përqendruar te loja. Krahas fotos, ai shkroi me ironi: “Mos u shqetësoni, ishte gjatë pauzës së reklamave.”
Komenti u interpretua si një referencë ndaj reklamës së fundit të Brooklyn Beckham për DoorDash, në të cilën ai tallet me konfliktin e vazhdueshëm me familjen.
Në reklamë, Brooklyn shfaqet duke parë Kupën e Botës nga shtëpia dhe thotë: “Me siguri po pyesni pse po e shoh Botërorin nga shtëpia. Nuk është se nuk kam bileta… Është një histori e gjatë.” Më pas ai ia dhuron biletat një korrieri.
Sipas mediave amerikane, Brooklyn është paguar mbi 1 milion dollarë për këtë reklamë.
Burime pranë familjes Beckham pretendojnë se prindërit e tij, David dhe Victoria Beckham, si edhe motra e vëllezërit, nuk e kanë pritur aspak mirë reklamën.
“Të bësh humor me largimin nga familja, ndërkohë që familjarët janë të shkatërruar emocionalisht, është diçka e tmerrshme,” u shpreh një burim.
Përplasja mes Brooklyn dhe familjes së tij është bërë publike muajt e fundit. Në janar, ai publikoi një deklaratë të gjatë në rrjetet sociale, ku akuzoi prindërit se kishin tentuar të dëmtonin marrëdhënien e tij me bashkëshorten, Nicola Peltz.
Sipas Brooklyn, Victoria Beckham ndërhyri edhe në dasmën e tyre luksoze në vitin 2022, duke prishur momentin e kërcimit të parë të çiftit para të ftuarve.
Ndërkohë, pjesa tjetër e familjes Beckham ka vazhduar të shfaqet e bashkuar në publik. David Beckham u mbështet nga Victoria dhe tre fëmijët e tjerë gjatë ceremonisë ku mori yllin në Hollywood Walk of Fame, ndërsa Brooklyn mungoi.
Megjithëse David dhe Victoria vazhdojnë ta përfshijnë Brooklyn në postimet e tyre familjare në rrjetet sociale, raportohet se ai u ka kërkuar të mos e bëjnë më këtë dhe që çdo komunikim me të të kalojë përmes avokatit të tij.
