Cutrone dërgon Milanin në çerekfinale të Kupës së Italisë
Milani ia doli të kalonte në fazën tjetër të Kupës së Italisë, por jo pa vështirësi. Në transfertë ndaj Sampdorias, ekipi i Gatussos fitoi me shifrat 0-2, por vetëm pas dy realizimeve mjaft të bukura të Patrik Cutrones, në 30 minutat shtesë të takimit.
Në debutimin e ardhjes së janarit, Paqueta, Sampdoria dhe Milani patën të dyja raste në 90 minutat e rregullta, por pa arritur të gjejnë rrugën e rrjetës, me portierët respektivë, Rafael dhe Reina që bënë detyrën.
Më pas, në 30 minutat shtesë, Patrik Cutrone shënoi dy herë. Në fillim në minutën e 102-të, fluturimthi pas një harkimi nga e djathta nga Andrea Conti, ndërsa në minutën e 108-të, realizoi sërish fluturimthi, këtë herë pas një harkimi mjaft të gjatë nga e majta e turkut Calhanoglu.
Tashmë Milani kalon në çerekfinale, dhe përballë do të gjejë fituesin e çiftit Napoli-Sassuolo.