17:01 / E Mërkurë, 09 Tetor 2019

Dardan Sejdiu, Vetëvendosjes: Po tregoheni të ligë, do iu drejtohemi organeve të drejtësisë

Kandidati për deputet nga radhët e PSD-së, Dardan Sejdiu ka deklaruar se lufta që vazhdon kundër kësaj partie është shenjë dobësie.

Sipas tij, PSD pësoi humbje në zgjedhje, por do të vazhdojë përpjekjet dhe programin e vet.

“Është e drejtë e saj meqë jetojmë në shoqëri të lirë.Mirëpo, atë që po e vërej nga sulmet e parreshtura të militantëve të LV-së është bindja e tyre se politika është luftë, kurse fitorja është hakmarrje.Të parën mund ta vazhdojnë, por të dytën s’mund ta bëjnë. Së paku, jo në një shoqëri të lirë dhe demokratike, ku njeriu ka të drejtë të ketë bindje të ndryshme dhe të ndryshojë mendje saherë që do.Në anën tjetër, një parti që sot nuk është në Parlament, nuk do të duhej të kishte rëndësi për pushtetin e ri. Ai i fitoi zgjedhjet duke premtuar burg për hajna, mosndryshim të kufijve dhe rrëzim të PDK-së.E, këto nuk u zhdukën të hënën në mëngjes. Hajnat janë ende të lirë, për ndryshim të kufijve ende po flitet – kurse PDK vazhdon të jetë në Kuvend” , shtoi Sejdiu, transmeton Indeksonline.

Ai tha poashtu se ndërkohë vazhdon lufta dhe linçimet kundër PSD-së, e cila sipas tij nuk ka vjedhë gjë, nuk përkrahu ndarjen e vendit dhe nuk është në Kuvend.

“Shpresoj se fitorja në zgjedhje nuk u arrit për ta linçuar PSD-në. Nëse po, atëherë ne paskemi qenë arsyeja e vërtetë e së keqes në këtë vend – kurse qeverisjet e kaluara paskan qenë vetëm arsyetim elektoral.N’rregull. Krejt në fund, më duhet ta theksoj një gjë: për çfarëdo ofendimi, sulmi dhe përpjekje për linçim do të detyrohemi, si individë dhe si grup, t’i drejtohemi organeve të drejtësisë. Kërkesat për internim të Kryetarit të Prishtinës meritojnë kallëzim penal”, tha ai.

Ish-deputeti i Kuvendit të Kosovës, Sejdiu tha se së paku këtë mund ta bëjnë, pasi prej të hënës e tutje do të ketë drejtësi të çkapur nga kriminelët./Indeksonline/