Dëmtohen varret myslimane dhe shkruhen slogane antiislame

Persona të panjohur kanë vandalizuar gjatë natës nga e premtja në të shtunën në parcelën e varreve myslimane në varrezën e Bois-de-Vaux të Lozanës. Ata kanë rrëzuar gurë dhe objekte tjera të varreve dhe kanë shkruar me sprej slogane antiislamike mbi tabelat e varreve ose i kanë shkatërruar ato. Po ashtu ata kanë shkatërruar edhe lulet dekorative të vendosura mbi varre, shkruan agjencia e lajmeve SDA duke iu referuar gazetës 24 heures.

Ndër sloganet e shkruara janë ato: „Myslimanët jashtë Zvicrës“ dhe „Kurani, plumbi i terrorizmit“. Në njoftimet gazetareske thuhet se ato janë shkruar në një frëngjishte të keqe, transmeton albinfo.ch.

Policia ka deklaruar se vetëm sot pasdite është informuar lidhur me rastin. Zyrtarët kompetentë kanë shkuar pasditen e sotme në vendin e ngjarjes duke siguruar gjurmët dhe kryer operacionet tjera të nevojshme. Posa të kenë mbaruar punën e tyre, përgjegjësit do të kthejnë varret në gjendjen e mëparshme.

Autoritetet e qytetit të Lozanës kanë dënuar përmes një komunikate në mënyrën më të ashpër këtë akt vandalist dhe janë zotuar se do të ushtrojnë padi, përcjell albinfo.ch. Familjarët e të vdekurve varret e të cilëve janë dëmtuar, do të informohen personalisht. Po ashtu autoritetet e qytetit kanë marrë kontakt me kryetarin e Bashkësisë Islame të kantonit.

Në parcelën myslimane të kësaj varreze ka vend për 350 varre. Para lejimit të parcelës, në vitin 2016 kishte pasur kundërshtime të ashpra.