Deputeti i LDK-së: Frashër Krasniqi e nisi fjalimin me gjuhë agresive
Ndalja e fjalimit të deputetit Frashër Krasniqi nga kryeparlamentari Kadri Veseli ka mbledhur Komisionin për Legjislacion.
Deputeti i Lidhjes Demokratike të Kosovës, Arben Gashi ka thënë se veprimi i Veselit nuk ka qenë në përputhje me Kushtetutën, por edhe gjuha e Frashër Krasniqit ishte agresive dhe me tendencë konfliktuoze, raporton Indeksonline.
“Ajo çka ndodhi në seancë nuk u kuptua mirë pse ndodhi. Normalisht që u vërejt një gjuhë agresive e deputetit. Në fakt deputeti filloi fjalimin me një tendencë konfliktuoze, por veprimet e Veselit ishin jo të rregullta”, ka thënë Gashi.
Ai gjithashtu ka përmendur kohën kur Vetëvendosja ka përdorur gaz e ka hedhur vezë në Kuvend dhe Veseli nuk ka marrë masa përjashtuese.
“Kemi pas raste Glauk kur na keni gjujt me gaz e me vezë, dhe kryetari i Kuvendit nuk merrte asnjë masë”, ka theksuar Gashi.
Kurse deputetët e Vetëvendosjes, Albulena Haxhiu dhe Glauk Konjufca e kanë cilësuar vendimin e Veselit si arbitrtrar.
“Kadri Veseli është njeri autoritar dhe Kuvendin e ka bërë si institucion privat”, ka thënë Haxhiu.
Kurse Konjufca deklaroi se Veseli e udhëheq seancën sipas qejfeve personale, por jo sipas ligjeve.