Dhomat e Specializuara vlerësojnë pronat e krerëve të UÇK-së, reagon ashpër OVL-ja

Organizata e Veteranëve të Luftës së UÇK-së ka shprehur shqetësim të thellë dhe indinjatë lidhur me raportimet se Dhomat e Specializuara të Kosovës janë duke vlerësuar pronat e ish-udhëheqësve të UÇK-së.

Në reagimin e saj, OVL UÇK-ja thekson se një veprim i tillë nuk mund të konsiderohet thjesht si hap procedural, shkruan IndeksOnline.

Sipas tyre, vlerësimi i pasurive në këtë fazë përbën devijim nga maturia gjyqësore dhe krijon perceptimin e një procesi që po nxiton drejt ndëshkimit, pa pritur një vendim përfundimtar.

Mes të tjerash, në reagim thuhet:

OVL UÇK, i sheh me shqetësim të thellë dhe indinjatë të fortë raportimet se Dhomat e Specializuara të Kosovës po vlerësojnë pronat e ish-udhëheqësve të UÇK-së.

Vlerësimi i këtyre pasurive nuk është thjesht një hap procedural. Përkundrazi, ky veprim braktis maturinë gjyqësore dhe krijon përshtypjen e një sistemi që nxiton drejt ndëshkimit para se të arrijë në një vendim.

Veprime të tilla godasin drejtpërdrejt parimin e prezumimit të pafajësisë, ndërsa gërryejnë besimin e publikut në paanshmërinë dhe drejtësinë e gjykatës.