Do të rishikohen edhe proceset paraprake të punësimeve në KEK, thotë deputetja Statovci

Deputetja nga Grupit Parlamentar i Vetëvendosjes, Jeta Statovci ka folur për anulimin e konkursit të Korporatë Energjetike të Kosovës (KEK), ku pati dyshime për punësime familjare e partiake.

Sa i përket kësaj, Statovci ka thënë se LVV-ja është e interesuar që në kuadër të Komisionit Hetimor të diskutohet edhe çështja e punësimeve në tërësi, pra jo vetëm për ato në konkursin e fundit, ku kjo parti u akuzua për rehatim të militantëve të saj.

“Ne e dimë që janë departamentet specifike që i udhëheqin proceset se në kuadër të institucioneve. Jemi të interesuar edhe në kuadër të komisionit hetimor që të diskutohet çështja e punësimeve në tersi duke filluar edhe nga më parë”, tha ajo në emisionin “Ditari” në Tëvë1.

Sipas saj, LVV-ja kërkon që të zbardhet të gjitha faktet rreth punësimeve në KEK.

“Edhe nëse kjo çështje vlerësohet që duhet rishikuar apo duhet një theks më i veçantë rreth procedurave të zhvilluara kjo padyshim që nuk paraqet dhe ne jemi ithtar që të asaj që të zbardhen të gjitha faktet”, deklaroi ajo.

Ajo thotë se do t’i hedhin sy edhe proceseve paraprake dhe të shohin në tërësi se çfarë ka ndikuar në operimin e KEK-ut.

“Po ashtu jemi të interesuar t’i hedhim një sy edhe proceseve paraprake që të shohim në tërësi se çfarë ka ndikuar në operimin e kësaj ndërmarrje”, tha më tej Statovci. /teve1.info/