E përplasën me makinë dhe e futën në një mjet tjetër, rrëmbehet një 22-vjeçar shqiptar në Francë

Një 22-vjeçar shqiptar është rrëmbyer nga disa persona në Francë. Ngjarja ka ndodhur dy ditë më parë në Riom.

Si të dyshuar janë akuzuar katër bashkatdhetarët e tij, po ashtu shqiptarë, që kishin hyrë ilegalisht në Francë.

Mediat franceze raportojnë se thuhet se kanë qenë dy makina që janë përplasur me njëra-tjetrën, dhe njëri nga drejtuesit e automjeteve është futur në makinën tjetër dhe ka rrëmbyer të riun shqiptar.

“Është pak e ndërlikuar nëse është një zhdukje shqetësuese ose rrëmbim. Nuk dimë shumë. Dëshmitarët janë shprehur se në fillim u dëgjua një zhurmë e madhe. Dy automjete ishin përplasur. Ai pa personat që ndodheshin në automjetin pas, të dilnin dhe të merrnin drejtuesin e mjetit përpara. Më pas u larguan”, thotë Eric Maillaud, prokuror publik.

“Ishte dëmtuar dhe dyert u hapën. Pronari i mjetit nuk korrespondon me personin e zhdukur, është dikush që nuk ka të njëjtën moshë. Prandaj hetuesit besojnë se ka qenë djali që është rrëmbyer. Në çfarë konteksti, ne nuk e dimë. Kjo mund të ndodhë në sfondin e trafikut të drogës por pa më shumë informacion në këtë fazë”, thotë prokurori.

Shtëpia e personit të zhdukur është në Lempdes. Mbetet bosh edhe sot e kësaj dite, dhe hetuesit nuk kanë arritur ende të gjejnë gjurmët e të riut.

Hetimi gjyqësor është hapur, pasi policia ka identifikuar 4 persona që mund të kishin lidhje me këtë zhdukje.

“Kanë lidhje me të zhdukurin. Ne vërtetuam se personi i zhdukur ishte në shtëpi pak kohë më parë ”, thotë Eric Maillaud. Ata janë 4 shtetas shqiptarë në gjendje të parregullt sipas prokurorit.

Edhe pse kanë të njëjtën kombësi, ata pranojnë se e kanë parë atë mbrëmje dhe më pas është larguar dhe se nuk e dinë ku ka shkuar, thotë prokurori. Katër të arrestuarit ndodhen në paraburgim, ndërsa vazhdojnë kërkimet për gjetjen e të riut.