“Facebook po gënjen publikun”, flet ish-punonjësja që zbuloi dokumentet sekrete

Identiteti i personit që zbuloi dhjetëra mijëra faqe kërkimesh dhe dokumentesh të brendshme – të cilat shkaktuan reagime të ashpra kundër Facebook – u zbulua në programin “60 Minutes”.

Ajo quhet Frances Haugen, ish-menaxhere e produktit në Facebook e cila ka punuar me çështjet e integritetit qytetar në kompani. Në dokumentet e siguruara nga ajo dhe të publikuara nga Wall Street Journal, tregohet se Facebook e di që platformat e kompanisë janë përdorur për të përhapur urrejtje, dhunë dhe keqinformim, por kompania është përpjekur t’i fshehë provat.

Në program, Haugen diskutoi vendimin e saj për të folur në lidhje me punën e brendshme të gjigantit të teknologjisë, duke thënë se ishte alarmuar nga politikat e kompanisë.

“Kishte konflikte interesi midis asaj që ishte e mirë për publikun dhe asaj që ishte e mirë për Facebook,” tha Haugen. “Dhe Facebook, pa pushim, zgjodhi të zgjedhë për interesat e veta, si të fitojë më shumë para.”

Haugen theksoi se dokumentet që ajo mblodhi dhe ndau me Wall Street Journal tregojnë se Facebook po gënjen publikun duke thënë se po bën përparim të rëndësishëm kundër urrejtjes, dhunës dhe keqinformimeve. “Versioni i Facebook që ekziston sot po copëton shoqëritë tona dhe po shkakton dhunë etnike në të gjithë botën,” tha ajo.

Haugen tha se ishte rekrutuar për t’u bashkuar me Facebook në vitin 2019, pasi kaloi më shumë se një dekadë duke punuar në industrinë e teknologjisë, përfshirë Pinterest dhe Google.

“Askush në Facebook nuk është keqdashës,” tha Haugen. Mark Zuckerberg “nuk ka vendosur kurrë që të krijojë një platformë urrejtjeje,” u shpreh ajo. Por, shtoi më pas, efektet e zgjedhjeve të kompanisë kanë qenë të rënda.

“Facebook e ka kuptuar se nëse ndryshojnë algoritmin për të qenë më të sigurt, njerëzit do të kalojnë më pak kohë në faqe, do të klikojnë në më pak reklama dhe [Facebook] do të bëjë më pak para,” tha Haugen.

Çështja do të gjykohet dhe Haugen është thirrur për të dëshmuar para Kongresit të martën. Në një deklaratë me shkrim për Wall Street Journal, zëdhënësi i Facebook Andy Stone u shpreh, “të sugjerosh që ne inkurajojmë përmbajtje të keqe dhe nuk bëjmë asgjë, thjesht nuk është e vërtetë”.