17:05 / E Hënë, 06 Korrik 2020 / indeksADMonline

Ferizaj me 7 drejtorë e kryesuesen e infektuar, gati për t’iu nënshtruar masave të reja

Komuna e Ferizajt, hyn në mesin e komunave më të prekura nga Covid-19, e në veçanti ditëve të fundit.

Komuna e udhëhequr nga Agim Aliu, ishte “paralizuar”, me gjysmën e drejtorëve të infektuar nga Covid-19.

7 drejtor, kryesuesja e Kuvendit komunal, nënkryetari i komunës si dhe tre anëtarë të kabinetit të kryetarit të komunës është bilanci i të prekurve me Covid-19, në administratën e kësaj komune.

Në një prononcim për IndeksOnline, kryetari i Ferizajt, Agim Aliu, tha se tashmë disa nga këta të prekur kanë hyrë në ditën e 16 që kur kanë rezultuar pozitiv, dhe se shpreson që shpejtë t’i kthehen normalitetit.

“Ne jemi në fazën ku disa  nga drejtorët  presin të ri testohen edhe tashmë kanë kaluar ato simptomat e zakonshme të Covid-19,  ne kemi 7 drejtor që kanë rezultuar pozitiv, në mesin e  tyre nënkryetarin dhe kryesuesja e Kuvendit dhe tre zyrtar nga kabineti im. Disa prej tyre janë në ditën e 16, që kur kanë rezultuar të infektuar dhe po presim, që ata të kthehen në normalitet”, tha Aliu për IndeksOnline.

Aliu ka komentuar masat e reja të ndërmarra nga Qeveria Hoti, në mesin e të cilat është ndalimi i qarkullimit për disa komuna. Ferizaj është në mesin e këtyre komunave e cila që nga ora 21:00 deri në 05:00, do të ketë të ndaluar qarkullimin për qytetarë, duke filluar që  nga sot.

 Aliu tha se ndonëse këto masa nuk janë pritur mirë nga qytetarët dhe komunitetit i bizneseve, do të zbatohen në përpikëri nga organet kompetente.

 “Janë  masa qe ne zakonshëm si kryetarë të komunave nuk i kemi kontestuar as në të kaluarën, për faktin se jemi nivel lokal dhe ne i zbatojmë vendimet që vijnë nga niveli qendror dhe tash fillojnë ato masa të aplikohen. Shpresoj që do të fillojnë të respektohet edhe pse nuk është mirëprit nga qytetarët dhe  as nga komuniteti i biznesit, sepse veçse kaluam në kufizim dhe në masa të ashpra. Si vendim i qeverisë, si të tillë e kemi  respektuar edhe më parë e do ta respektojmë edhe në këtë rast”, theksoi tutje Aliu.

Ali ka treguar se sot gjatë ditës ka pasur një takim me shtabin emergjentë, me të cilët ka diskutuar për situatën aktuale dhe për hapat që do të ndërmarrin secili mekanizëm institucional veç e veç.

Aktualisht në komunën e Ferizajt, janë 101 raste aktive, nga 242 sa ishin në tërësi rastet që nga fillimi i pandemisë, ndërsa janë shëruar 139 persona, e me fatalitet kanë përfunduar 2 të tjerë./IndeksOnline/