Forumi 2015 ekzaminon marrëdhëniet e Kosovës me shtetet e BE-së

Forum 2015 organizon sot diskutimin e radhës që synon të eksplorojë mënyrat se si shtetet anëtare të BE-së angazhohen me Kosovën.

Shpallja e Pavarësisë së Kosovës në shkurt 2008 krijoi ndasi të thella brenda Bashkimit Evropian. Përderisa 23 vende anëtare e njohën Kosovën, pesë të tjera refuzuan ta pranojnë shtetësinë e saj.

Në atë kohë mendohej se edhe këto vende eventualisht do të renditeshin pas dhe do ta pranonin Kosovën. Mirëpo, edhe pas gati një dekade, kjo gjë nuk ndodhi. Përkundrazi, situata vetëm sa është bërë edhe më komplekse.

Në vend të dy kampeve të ndryshme, sot ekzistojnë katër grupe. Së pari, janë vendet që e kanë njohur Kosovën dhe kanë ndërtuar raporte domethënëse me të. Këtu bëjnë pjesë Britania dhe Gjermania dhe shumë vende të tjera anëtare të BE-së.

Në anën e kundërt të peshores janë shtetet që vazhdojnë ta refuzojnë njohjen e Kosovës, dhe kanë shumë pak raport me të. Spanja dhe Qiproja hyjnë në këtë kategori.

Mirëpo, në mes të këtyre dy poleve janë edhe dy grupe të tjera. Për shembull, Greqia, Rumania dhe Sllovakia refuzojnë ta njohin Kosovën, por, megjithatë kanë krijuar raporte normale me Prishtinën.

Ndërkohë, Republika Çeke dhe Polonia, edhe pse e kanë njohur Kosovën, në fakt, në këto dhjetë vitet e fundit, kanë pasur relativisht pak shkëmbime diplomatike me autoritetet e Kosovës.

Ky forum do të ekzaminojë marrëdhëniet e Kosovës me këto katër kategori të përgjithshme shtetesh.

Për të diskutuar rreth kësaj çështje, kemi ftuar Ministrin e Ministrisë së Punëve të Jashtme Behxhet Pacolli, të gjithë autorët e raportit, si dhe panelistët: James Ker-Lindsay – Profesor i politikës dhe politikave në Universitetin St. Mary’s, Twickenham dhe vizitor i lartë studimesh (Senior Visiting Fellow) në London School of Economics; Ioannis Armakolas – Asistent profesor në Departamentin e Studimeve ballkanike, sllave dhe orientale – Universiteti i Maqedonisë, Selanik dhe Drejtues i Programit për Evropë Juglindore në Fondacionin Helen për Politika Evropiane dhe të Jashtme (ELIAMEP); Lulzim Peci – Drejtor Ekzekutiv, Instituti Kosovar për Kërkime dhe Zhvillime të Politikave (KIPRED) dhe Agon Demjaha – Asistent Profesor i shkencave politike dhe marrëdhënieve ndërkombëtare – Universiteti shtetëror i Tetovës.