Gazeta franceze: Florenc Beqiraj kishte tentuar 7 herë vetëvrasjen

Gazeta e njohur franceze “Le Figaro”, në një shkrim të saj për rastin Florenc Beqiraj, shkruan se Florenc Beqiri kishte tentuar shtatë herë vetëvrasjen.

Kjo dramë është pjesë e një sërë përpjekjesh për vetëvrasjet e emigrantëve në dy muajt e fundit në qendrën e paraburgimit, duke u varur ose duke thyer krahët, siç u tha në Forumin për Refugjatët.

“Shqiptari ndodhej në Francë prej 19 muajsh dhe u vendos në paraburgim në fund të nëntorit, pas refuzimit të kërkesës së tij për azil dhe detyrimit për të lënë territorin”, është shprehur Forumi i Refugjatëve. Por ky forum hedh dyshime për motivet e vetëvrasjes së Florenc Beqirit. Sipas tij, Beqiri donte vetëm të kthehej pranë familjes. “Shoqata, sipas së cilës përpjekja e vetëvrasjes është ‘pashpjegueshme’, specifikon se migranti kishte hequr dorë nga rishqyrtimi i kërkesës së tij për azil dhe uronte që të ‘kthehej sa më shpejt që Shqipëri dhe të bashkohej me familjen e tij për festimet e Vitit të Ri’”, thuhet në shkrimin e gazetës së njohur franceze “Le Figaro”.

AZILANTËT

Numri i shqiptarëve që kërkojnë azil në Francë është rritur me 135% krahasuar me një vit më parë. Gazeta “Le Figaro” në një shkrim të saj shpreh shqetësimin e autoriteteve franceze për këtë rritje kaq të madhe.

“Një e treta e popullsisë tashmë e ka lënë vendin për t’u vendosur diku tjetër në Europë. Qëllimi i vizitës dyditore të ministrit të Brendshëm francez, Gerard Collomb, ishte sqarimi njëherë e mirë me Tiranën i pozicioneve për çështjen e migracionit. Çështja është serioze. Në vitin 2017, shqiptarët, edhe pse vijnë nga një vend i ashtuquajtur ‘i sigurt’, dmth., që përmbush kriteret demokratike të mjaftueshme për Europën, janë azilkërkuesit e parë në Francë: më shumë se 7,000 kërkesa janë depozituar në një vit, me një rritje prej 135% krahasuar me vitin 2016. Por ajo që është më shqetësuese, është fakti se kemi një numër në rritje të të miturve të pashoqëruar, të cilët më pas bëhen pre e rrjeteve kriminale”, shkruan gazeta franceze “Le Figaro”.

Ministri i Brendshëm francez Gerard Collomb nuk e fshehu qëllimin e vizitës dyditore të tij në Tiranë një javë më parë, që ishte numri i lartë i shqiptarëve që kërkojnë azil në Francë.

“E pata takuar zotin Kryeministër, ministrin e Çështjeve Europiane dhe të Punëve të Jashtme, si dhe ministrin e Brendshëm më 20 korrik të këtij viti, për disa çështje që për ne janë të rëndësishme, qoftë për emigrimin e paligjshëm lidhur me azilkërkuesit, si dhe për çështjen e rrjeteve të krimit të organizuar. Patëm një bisedë shumë pozitive. Patëm vendosur që të ecnim përpara dhe kur shoh gjithë progresin dhe rezultatet që janë arritur këto muajt e fundit, mund të them që jemi të kënaqur dhe kemi besim lidhur me vullnetin që ka pala juaj dhe së bashku ne, për të vazhduar luftën në këto fusha dhe për të rritur bashkëpunimin mes dy vendeve tona”, u shpreh ministri francez në konferencën e përbashkët për shtyp me Kryeministrin Rama.

Sipas tij, në vendet e strehimit në Francë për të pritur azilkërkuesit, 20% i zënë shqiptarët, të cilët kanë ardhur pa vizë, por që kanë kërkuar azil. Ministri Collomb u shpreh i gatshëm të asistonte Ministrinë e Brendshme me dy oficerë francezë krahas atyre gjermanë dhe amerikanë në luftën kundër krimit të organizuar.

“Çështja e migracionit të paligjshëm kërkon zgjidhje nga të dyja palët. Edhe rregullat që janë sot në fuqi në Francë, kanë nevojë për përmirësim”, tha ministri Collomb pas marrëveshjes së nënshkruar me homologun e tij, Fatmir Xhafaj.