18:45 / E Premte, 23 Shtator 2022 / Gjelbrim

Giresse: Kemi ardhur në Irlandë për të marrë rezultat pozitiv

Kombëtarja e Kosovës udhëtoi sot për në Belfast, atje ku do të takohet nesër me Irlandën e Veriut në Ligën e Kombeve.

Kjo ndeshje i takon xhiros së pestë dhe të parafundit në Grupin 2 të Ligës C.

Në konferencën për media është paraqitur përzgjedhësi i Kosovës, Alain Giresse, i cili e vlerësoi si të rëndësishme ndeshjen e nesërme.

“Nëse flasim për ndeshjen e nesërme patjetër që është një ndeshje shumë e rëndësishme për faktin se është ndeshje zyrtare, e cila vlerësohet me pikë nga UEFA. Ne, si Kosovës, kemi ardhur këtu për të tentuar për të marrë rezultat pozitiv nga kjo përballje”, u shpreh Giresse, shkruan Gazeta Express.

Kujtojmë se ndeshja mes Irlandës së Veriut dhe Kosovës do të zhvillohet nga ora 18:00, në stadiumin “Windsor Park”.

“Dardanët” ndodhen në pozitën e dytë në këtë grup me 6 pikë, katër më shumë se kundërshtarët e nesërm, të cilët ndodhen një pozitë më poshtë.