“Jam i zhgënjyer nga biseda që pata me Putinin”, Trump: Ai nuk po mendon të ndalet
Presidenti i SHBA-së, Donald Trump, tha të enjten se ishte i zhgënjyer nga telefonata me Vladimir Putinin, pasi presidenti rus dukej i pavullnetshëm për t’i dhënë fund luftës në Ukrainë.
Përpjekjet e SHBA-së për t’i dhënë fund luftës në Ukrainë përmes mjeteve diplomatike duket se kanë ngecur dhe Trump po përballet me thirrje, madje edhe nga disa republikanë, për të rritur presionin mbi Putinin për të negociuar.
Pas telefonatës midis dy udhëheqësve dje, presidenti i SHBA-së tha se planifikonte të fliste sot me homologun e tij ukrainas, Volodymyr Zelensky, siç u tha gazetarëve pas kthimit të tij në Uashington nga një udhëtim në Iowa.
“Jam shumë i zhgënjyer nga biseda që pata sot me presidentin Putin”, theksoi Trump.
“Po them vetëm se ai nuk po mendon të ndalet dhe kjo është shumë keq. Nuk kam bërë asnjë përparim me të”, shtoi ai.
Gjatë bisedës së tyre gati njëorëshe, Trump dhe Putin nuk diskutuan vendimin e fundit të SHBA-së për të ndaluar disa furnizime me pajisje ushtarake për Ukrainën, tha Yuri Ushakov, këshilltari i presidentit rus.
Trump u tha gazetarëve ndërsa nisej për në Iowa se SHBA-ja nuk e ka ndaluar plotësisht furnizimin me armë të Ukrainës dhe akuzoi paraardhësin e tij, Joe Biden, se dërgoi kaq shumë pajisje ushtarake në Kiev saqë rrezikonte dobësimin e mbrojtjes së SHBA-së.
“Ne po japim armë, por kemi dhënë kaq shumë, më shumë se duhet”, tha republikani.
“Ne po punojmë me ta dhe po përpiqemi t’i ndihmojmë, por nuk e kemi ndaluar plotësisht. Biden e zbrazi vendin tonë duke u dhënë atyre armë, dhe ne duhet të sigurohemi që kemi mjaftueshëm për veten tonë”, shtoi ai.
Vendimi i SHBA-së për të ndërprerë disa armë e zuri Kievin në befasi dhe ka shkaktuar konfuzion në lidhje me pikëpamjet e Trump mbi konfliktin. Javën e kaluar, presidenti i SHBA-së tha se do të përpiqet të dërgojë një sistem mbrojtës raketor “Patriot” në Ukrainë.
Zyrtarët ukrainas folën me të dërguarin e SHBA-së në Kiev të mërkurën për të theksuar rëndësinë e ndihmës ushtarake që vendi i tyre merr nga Uashingtoni dhe për ta paralajmëruar atë se ndërprerja e disa armëve do të dobësonte aftësinë e Ukrainës për t’u mbrojtur.
