Kate Middleton jep mesazhin emocionues për betejën e saj me kancerin
Kate Middleton ka ndarë një mesazh emocional rreth asaj se si një diagnozë me kancer ndikon te pacientët, duke zbuluar se ajo përfundoi me sukses sfidën e famshme britanike të alpinizmit për të “eksploruar jetën përtej diagnozës”.
Princesha e Uellsit, 44 vjeçe, njoftoi në Instagram të dielën se kishte marrë pjesë në “Sfidën kombëtare të tri majave” dhe ndau një foto nga maja e malit Ben Nevis të Skocisë, së bashku me mendimet e saj për përballimin e sëmundjes së rëndë, transmeton Indeksonline.
“Kanceri nuk prek vetëm trupin. Ai ndryshon mënyrën se si mendoni dhe ndiheni dhe ndikon thellësisht në çdo aspekt të jetës”, shkroi ajo.
“Çdo vit, qindra mijëra njerëz në këtë vend dëgjojnë fjalët që askush nuk dëshiron t’i dëgjojë”, e nisi mesazhin e saj Kate. “Ajo që vijon është një udhëtim që vë në provë çdo pjesë të nesh: fizikisht, emocionalisht, psikologjikisht dhe shpirtërisht. Sfidat shtrihen përtej, duke ndikuar në familje, miqësi, punë dhe ato momente të qeta që kalojmë vetëm me mendimet tona.”
“E di këtë nga përvoja personale dhe e di që udhëtimi përmes trajtimit dhe më tej kërkon më shumë sesa vetëm ilaçe”, shtoi princesha. Kujtojmë se në mars të vitit 2024, ajo njoftoi se po trajtohej për kancerin pas një operacioni në bark. Në shtator të të njëjtit vit, ajo konfirmoi se kishte përfunduar kimioterapinë dhe në janar të vitit 2025, njoftoi se ishte në remision. Lloji i kancerit nuk është zbuluar kurrë publikisht./Indeksonline/
