Kishte vetëm 10 ditë në shtëpinë e tyre, babai i dy fëmijëve lë partneren për refugjaten ukrainase

Një 29-vjeçar britanik ka braktisur partneren e tij pasi ra në dashuri me refugjaten ukrainase, e cila u strehua në shtëpinë e tyre për t’i shpëtuar luftës.

Tony Garnett dhe partnerja e tij 28-vjeçare morën Sofia Karkadym në fillim të majit, por vetëm 10 ditë më vonë martesa e tyre në dukje e lumtur, përfundoi.

Kjo për shkak se babai i dy fëmijëve u largua me 22-vjeçare nga Ukraina. Roja i sigurisë, i cili jeton në Bradford, ka rrëfyer se është i dashuruar me të renë dhe dëshiron të kalojë pjesën tjetër të jetës me të.

Sofia, e cila u largua nga qyteti i Lviv në Ukrainën perëndimore ka thënë se “e dashuroi Tony-n sapo e pa”. Tani ata po jetojnë historinë e tyre të dashurisë.

Duke pranuar dhimbjen që i ka shkaktuar ish-partneres, burri ka thënë se ai “ka zbuluar një lidhje me 22-vjeçaren siç nuk e ka pasur më parë”.

Familja britanike e kishte marrë Sofian në një përpjekje për të ndihmuar të ikurit ukrainas nga pushtimi rus. Teksa ka folur për “The Sun”, Tony është shprehur se 22-vjeçarja ishte personi i parë që ka kontaktuar në një faqe në “Facebook”, ku i ofroi strehimin e një refugjati.

Sofia, e cila punon si menaxhere e IT-së, fluturoi në Mançester më 4 maj, pasi priti për javë të tëra në Berlin për miratimin e vizës së saj në Mbretërinë e Bashkuar.

29-vjeçari tregoi se ka krijuar një lidhje shumë shpejt me ukrainasen dhe se vajzat e tij, gjashtë dhe tre vjeç gjithashtu e pëlqyen shumë atë. Ndërsa partnerja e tij prej 10 vitesh nuk e kishte pëlqyer.