Kjo do të jetë rritja e pagave për çdo mësimdhënës në Kosovë

Qeveria e Kosovës përgjatë një viti ka bërë rritje të pagave në arsim për 20 milionë euro.

Kjo gjë është bërë e ditur nga kryeministri i vendit, Ramush Haradinaj. Pas një takimi që pati me përfaqësuesit e SBASHK-ut, Haradinaj theksoi se oferta e sotme drejtuar mësimdhënësve është e fundit dhe se nuk duhet të hamendësohen dhe të mendojnë se do të ketë edhe një ofertë tjetër.

Ndërsa rritja e pagave të propozuara nga Qeveria e Kosovës sot janë kësisoj:

Për mësimdhënësit e shkollave të mesme, nga paga aktuale që është 523 euro, propozohet rritja në 597.8 euro, që i bie rritje për 74.8 euro. Numri i mësimdhënësve në këtë kategori është 5 mijë.

Për mësimdhënësit në shkollat fillore, nga paga aktuale që është 479 euro, propozohet rritje në 525.8 euro, që i bie rritje prej 46.8 euro. Numri i mësimdhënësve në këtë kategori është 790, raporton Indeksonline.

Për mësimdhënësit në arsim parashkollor, nga paga aktuale që është 447 euro, propozohet rritje në 501.9 euro, që i bie 54.9 euro. Numri i mësimdhënësve në këtë kategori është 912.

Dhe kategoria e mësimdhënësve në shkollat speciale, paga aktuale e të cilëve është 476 euro, propozohet rritje në 525.8 euro, që i bie rritje për 49.8 euro. Në këtë kategori janë 125 mësimdhënës.

Kryeministri Haradinaj ka ftuar Këshillin Drejtues të SBASHK-ut, që të shqyrtojë këtë ofertë dhe të marr vendim të arsyeshëm, për të mirën e nxënësve dhe të arsimit në vend./Indeksonline/

https://indeksonline.net/haradinaj-kemi-rritur-pagat-per-mesimdhenesit-ftojme-sbashk-un-qe-te-nderpresin-greven/