Kryetari i Nju Jorkut hidhet në ujë, hapet sezoni i pishinave falas

Pishinat e jashtme falas të qytetit të Nju Jorkut janë zyrtarisht të hapura për sezonin duke filluar nga e shtuna. 

Kryebashkiaku Zohran Mamdani dhe anëtarët e Departamentit të Parqeve të NYC-së e nisën fundjavën me një hedhje në pishinën “Thomas Jefferson” në East Harlem, për të shënuar hapjen, raporton cbs. 

Kjo është një nga mbi 50 pishinat publike të jashtme në të pesë lagjet që do të hapen çdo ditë nga ora 11:00-19:00 deri më 13 shtator.

Pishinat mbyllen çdo ditë nga ora 15:00-16:00 për pastrim të detyrueshëm. 

Pishina “Red Hook” në Bruklin mbetet e mbyllur  për shkak të dëmtimit të pajisjeve, por qyteti shpreson ta hapë atë para fundit të korrikut. 

Kostumet e banjës janë të detyrueshme në të gjitha pishinat publike dhe vizitorët duhet të kenë me vete një dry për të mbajtur sendet e tyre të sigurta në dhomat e zhveshjes. Ushqimi, telefonat dhe shishet e qelqit nuk lejohen.

Zyrtarët thanë se qyteti po zgjeron shërbimet dhe programet në pishinat publike këtë vit.

Më shumë se 1 milion njerëz vizituan pishinat e qytetit verën e kaluar, sipas Departamentit të Parqeve, ndërsa njujorkezët kërkonin mënyra për të mposhtur vapën në ditët e nxehta të verës.