14:43 / E Diele, 15 Shtator 2019

Kur veturat gjermane ”teshtijnë”, ekonomia ”ftohet”

Shtyllë e industrisë gjermane prej dekadash, sektori i automjeteve është kthyer tashmë në thembrën e Akilit, i ndjeshëm ndaj konflikteve tregtare dhe i papërgatitur për të ardhmen, me rrezikun e një bilanci të rëndë social.

”Shëndeti i sektorit të automjeteve është më mirë nga sa ishte parashikuar”, theksoi Marc Forstermann, ekspert i kabinetit EY, në hapje të sallonit të automjeteve në Frankfurt.

“Sfidat teknologjike dhe strukturore janë të mëdha”, shtoi ai.

“Sidoqoftë, në tetë muajt e parë të vitit, prodhimi i automjeteve është ulur me 11% në një vit”, sipas shifrave të federatës së prodhuesve gjermanë, VDA.

Shkaku ka qenë lufta tregtare, ngadalësimi ekonomik dhe pasiguritë rreth Brexit, në një kohë kur prodhuesit duhet të investojnë masivisht në sektorin elektrik.

“Efekti mbi furnitorët është shumë i madh, sa ka filluar të vërehet mbikapacitet”, theksoi Stefan Bratzel, drejtor i ”Center of Automotive Management”.

Shembulli i fundit, kompania familjare Eisenmann, themeluar në vitin 1951 dhe specializuar për lyerjen e makinave, ka njoftuar në fund të korrikut falimentimin e saj duke kërcënuar rreth 3 000 punonjës.

”Në tremujorin e dytë, përfitimi operacional i tre prodhuesve gjermanë u ul me 38%, shumë më tepër sesa mesatarja botërore e sektorit (-18%)”, sipas EY.

Sektori i automjeteve përbën një të pestën e industrisë, rreth 5% të PBB-së dhe me më shumë se 800 000 punonjës.