Kush i shkoi e kush nuk i shkoi Kryeministrit Kurti sot në takim, me kryetarët e komunave

Kryeministri i vendit, Albin Kurti, ka takuar sot disa prej kryetarëve të komunave, për të diskutuar rreth situatës me COVID-19.

Ani pse ftesa ishte për të gjithë kryetarët e komunave, shumica prej tyre nuk morën pjesë në këtë takim.

Në njoftim është bërë e ditur se në takim ishin të pranishëm 12 kryetarë të komunave të Kosovës, ndërkaq në mesin e tyre janë parë kryetarët e tri komunave që udhëhiqen nga Lëvizja Vetëvendosje, kryetari i Prizrenit, Mytaher Haskuka, ai i Podujevës Shpejtim Bulliqi, dhe ai i Mitrovicës Agim Bahtiri.

“Në takim ishin të pranishëm kryetarët e 12 komunave të Kosovës, të cilët njoftuan për vështirësitë teknike që kanë në komunat e tyre në përballje me pandeminë. Kryeministri Kurti tha se së bashku me ministrin e Shëndetësisë, Arben Vitia do të jetë në komunikim të vazhdueshëm edhe me komunat e tjera që nuk ishin të pranishëm në takim”, thuhet në njoftimin e zyrës së Kryeministrit.

Megjithatë, nga Zyra e Kryeministrit kanë njoftuar se në këtë takim ku ishin të pranishëm edhe ministri i Shëndetësisë Arben Vitia dhe ai i Pushtetit Lokal, Elbert Krasniqi, është folur për masat e ndërmarra për parandalimin e përhapjes së COVID-19 dhe për variantin Delta.

“Karakteristikat specifike të variantit Delta e bëjnë atë të fortë, të rrezikshëm dhe të paparashikueshëm, tha kryeministri Kurti. Ai theksoi se varianti Delta karakterizohet me një numër riprodhues jashtëzakonisht të lartë, sipas së cilit çdo person i infektuar me këtë variant, infekton mesatarisht shtatë persona të tjerë, ka interval serial jashtëzakonisht të shkurtër me ç’rast çdo person i infektuar mund të infektojë të tjerët mesatarisht 2.5 ditë pasi që është infektuar vetë dhe përhapet kryesisht nëpërmjet ngjarjeve super-shpërndarëse”, thuhet në njoftim.

“Nevojitet bashkëpunim i ngushtë ndërmjet Qeverisë dhe komunave, sidomos në mes të Policisë, inspektorëve komunalë dhe inspektorëve të AUV-it”, ka deklaruar Kurti.