20:35 / E Diele, 26 Maj 2019 / indeksADMonline

Ky futbollist i Feronikelit fjeti vetëm një orë para ndeshjes me Prishtinën

Skuadra e Feronikelit frymon si një familje dhe këtë e dëshmoi edhe në emisionin “Oxygen” të moderatorit Besim Dina.

Atmosfera që krijuan katër lojtarët e skuadrës, Mevlan Zeka, Lapidar Lladrovci, Kastriot Rexha dhe Yll Hoxha, ishte e jashtëzakonshme.

Kapiteni i skuadrës, Lapidar Lladrovci, që ka merita të mëdha për shpalljen e ekipit kampion, ka treguar një prapaskenë interesante para ndeshjes që vendosi titullin kundër Prishtinës.

Ai zbuloi se mesfushori i skuadrës, Albutrint Morina, kishte fjetur vetëm në mbrëmjen para takimit.

“Para ndeshjes e pyeta Albutrintin nëse kishte pushuar dhe më tha se po shumë mirë”.

“Pas sfidës erdhi dhe më tregoi të vërtetën, ai kishte fjetur vetëm një orë nga emocionet sepse për të është titulli i parë në karrierë”, tregoi Lapidari.

Kamerat fokusonin mesfushorin i cili qeshte dhe duartrokiste.

Pas përfundimit të kuizit, lojtarët e Niklit kanë bërë një gjest fantastik.

Shumën e fituar, që ishte 700 euro, ata e kanë dhuruar për zonjën nga Gjakova, Ferdonije Qerkezi.

Ajo ka mbetur e vetme që prej luftës së vitit 1999, ku forcat serbe ia kanë vrarë burrin dhe katër djemtë.

Fjalimin përmbyllës e mbajti Zeka.

“Këtë shumë ia dërgojë si donacion familjes Qerkezi nga Gjakova, zonjës Ferdone të cilës ia kanë vrarë familjen në luftë”, deklaroi Zeka.

“Kemi dëgjuar që zonjës iu është ndalur edhe pensioni, atëherë për këtë familje shkon kjo shumë”, shtoi ai.

Gjesti u përcoll me një duartrokitje të madhe nga të gjithë të pranishmit.

“Ju lumtë. Krenar me këta djemë”, shtoi Besim Dina në fund.