Liberalizimi, Çakori e Zhlebi, Isa Mustafa lajmërohet nga Facebooku

Ish-kryeministri i vendit, njëherësh i pari i LDK-së, Isa Mustafa ka folur sot lidhur me procesin e liberalizimit të vizave si dhe me çështjen e demarkacionit.

Mustafa ka thënë se përpos që nuk u përmbush zotimi i vizave , poashtu nuk u përmbushën zotimet se kufiri do të zhvendoset në Çakorr. Mustafa tha se Haradinaj pati ngritur një kauzë të rrejshme për marrëveshjen e kufirit me Malin e Zi.

Sipas Mustafës, Haradinaj dhe disa ‘shërbyes’ të tij, profesorë e deputetë ngulnin këmbë se kufiri është në Zhleb e Çakorr dhe se Kosova humb 8200 hektarë. Këtë vit demarkacioni u ratifikua, e votuan 80 deputetë, kufiri nuk lëviz, por që vizat nuk u hoqën.

Tutje ish-kryeministri Mustafa tha se është mirë që para ambasadave të vendoset edhe fotografie e Qeverisë Haradinaj.

Postimi i plotë:

Liberalizimi, Çakori e Zhlebi

Mbetëm pa përmbushje të zotimeve për liberalizim dhe mbetëm pa përmbushje të zotimeve se kufiri do të zhvendoset ne Çakor. Ndërkaq, askush nuk merr përgjegjësi.

Ishte kontestimi që ia bëri Kryetari i AAK-së, tani Kryeministër, me kauzë të rrejshme marrëveshjes për kufirin me Malin e Zi që qoi që procesi i liberalizimit të mos fillojë me kohë. Ai dhe disa shërbyes të tij, deputetë e profesorë, ngulnin këmbë se kufiri është në Zhleb dhe Çakorr dhe se Kosova po humb 8200 hektarë. Këtë vit demarkacioni u ratifikua, e votuan 80 deputet, kufiri nuk po lëvizë, mbeti aty ku u caktua me marrëveshje, por vizat nuk u hoqën.

Do të ishte mirë që para ambasadave, ku rreshtohen e maltretohen me qindra qytetarë me nga një çantë dokumente për të marrë një vizë, t’ua vejmë fotot e atyre që me paturpësi, vetëm për të përfituar nga popullizmi, na sollën në këtë situatë. Edhe fotografinë e Qeverisë së sotme.

BE-ja nuk ishte parimore me Kosovën, se na vëri më shumë kushte sesa vendeve të tjera, por BE-ja na informoi me kohë, në vitin 2015 dhe 2016, se nëse vonohemi me ratifikim të marrëveshjes, do të prolongohet liberalizimi. Këtë e kanë ditur të gjithë!

Mos te kemi iluzione as në të ardhmen se me një Qeveri me 1/3 e ministrave me aktakuza, që merr vendime arbitrare, me 80 zëvendësministra, vizat nuk hiqen. Vizat së pari duhet t’ia heqin qeverisë së tanishme për ta quar në shtëpi, e pastaj t’ia heqin vetvetes duke e zgjedhur një qeveri e cila punon për interesat e qytetarëve e jo për klientelën e vet.