Lladrovci dhe IADK nënshkruan marrëveshje bashkëpunimi

Kryetari i Komunës së Drenasit, Ramiz Lladrovci ka pritur në takim Drejtorin Ekzekutiv të Iniciativës për Zhvillimin e Bujqësisë së Kosovës, Zenel Bunjaku, me ç’rast kanë nënshkruar marrëveshje për bashkëpunim.

Komuna e Drenasit dhe IADK-ia me nënshkrimin e kësaj marrëveshje, pajtohen të rregullojnë një bashkëpunim të afërt me qëllim të ruajtjes së vazhdimësisë së projekteve bujqësore të realizuara nga Iniciativa për Zhvillimin e Bujqësisë së Kosovës (IADK) në Komunën e Drenasit.

Kjo marrëveshje ka për qëllim të përshkruaj bashkëpunimin në mes Komunës së Drenasit dhe IADK-së gjatë periudhës shtator 2018-qershor 2020, për të drejtat dhe detyrat e palëve kyçe, ku si qëllim i fundit është ndihma dhe përkrahja e fermerëve të kthyer të cilët do të jenë në gjendje të prodhojnë për nevoja të veta dhe për treg.

“Iniciativa për Zhvillimin e Bujqësisë së Kosovës (IADK) është duke e zhvilluar projektin “Përfshirja ekonomike e të kthyerve përmes bujqësisë në zonat rurale dhe ngritja e kapaciteteve përmes trajnimeve profesionale” në Komunën e Drenasit dhe katër komuna tjera, përkrahur nga Deutsche Gesellschaft fur Internacionale Zusammenarbeit (GIZ), i mandatuar nga Qeveria e Republikës Federale të Gjermanisë”, thuhet në komunikatën për media./Indeksonline/