16:51 / E Martë, 11 Qershor 2024 / MSH

Lukas Mandl dekorohet me Medaljen e Artë për Shërbim ndaj Austrisë

Lukas Mandl u nderua me Medaljen e Artë për Shërbim ndaj Austrisë në një ceremoni solemne që u mbajt sot në shtetin austriak. Medalja e Artë iu dha nga kryetari i Parlamentit të Austrisë, i cili përmendi kontributet e rëndësishme të Mandl në shërbim të vendit.

Lajmi për dekorimin e Mandl u bë publik nga miku i tij, avokati ArsimVranovci, i cili gjithashtu ishte i pranishëm në ceremoninë e dekorimit së bashku me familjen e tij.

Vranovci shprehu krenarinë dhe gëzimin e tij për këtë arritje të mikut të tij dhe e ka cilësuar këtë moment si një dëshmi e përkushtimit dhe punës së palodhur të Mandl për të mirën e Austrisë.

Gjithashtu, pjesë e kësaj ceremonie ishte edhe rektori i Universitetit “Kadri Zeka” në Gjilan, Prof. asoc. Dr. Artan Dërmaku.

Ceremonia e veçantë mblodhi shumë personalitete të njohura dhe miq të afërt të Mandl, të cilët së bashku kremtuan këtë nder të merituar.

Mandl, përveç kontributit të jashtëzakonshëm për shtetin austriak, tash e një kohë është edhe zë i fuqishëm i Kosovës në Parlamentin Evropian.

Miku i shtetit tonë ka lobuar për të drejtat e Kosovës dhe për rrugën evropiane të saj.