Lushtaku: Sveçla mori vendim të paligjshëm për vazhdimin e vlefshmërisë për gjashtë muaj të letërnjoftimeve të skaduar

Deputeti i PDK-së, Mërgim Lushtaku e ka quajtur të paligjshëm vendimin e Ministrit të Punëve të Brendshme, Xhelal Sveçla për vazhdimin e vlefshmërisë për gjashtë muaj të letërnjoftimeve të skaduara.

Lushtaku shkruan se ky vendim është shkelje flagrante e dispozitave të Ligjit Nr. 05/L -015 për Letërnjoftim. Ky vendim është në kundërshtim me nenin 12 të këtij ligji, sipas të cilit, në bazë të fuqisë ligjore (ex-lege), letërnjoftimi është i pavlefshëm, përveç tjerash, edhe me kalimin e afatit të vlefshmërisë, transmeton Indeksonline.

Postimi i plotë:

Edhe një vendim tjetër i paligjshëm i Qeverisë Kurti!

Të dashur qytetarë,

Siç e kemi thënë disa herë, kushtetuta dhe ligji për qeverinë Kurti dhe ministrat e saj, janë vetëm instrumente pas të cilave fshehin veprimet e vendimet e tyre arbitrare, në dëm të interesit publik dhe ligjshmërisë si kusht i rendit demokratik.

Vendimi i Ministrit të Punëve të Brendshme Xhelal Sveçla për vazhdimin e vlefshmërisë për gjashtë muaj të letërnjoftimeve të skaduara, është shkelje flagrante e dispozitave të Ligjit Nr. 05/L -015 për Letërnjoftim. Ky vendim është në kundërshtim me nenin 12 të këtij ligji, sipas të cilit, në bazë të fuqisë ligjore (ex-lege), letërnjoftimi është i pavlefshëm, përveç tjerash, edhe me kalimin e afatit të vlefshmërisë.

Vazhdimi i vlefshmërisë së letërnjoftimeve të skaduara, duhet të shfuqizohet sa më parë, në mënyrë që të evitohen pasojat e pariparueshme që shkaktohen përgjatë krijimit, ndryshimit apo shuarjes së marrëdhënieve juridike që qytetarët i vendosin mbi bazën e letërnjoftimeve të skaduara.

Fakti se ky ligj përcakton gjoba për shkak të pavlefshmërisë së letërnjoftimit, konfirmon rëndësinë e mos lejimit të situatave në dëm të qytetarëve dhe institucioneve ligj-zbatuese, sepse siguria juridike është edhe parimi, e edhe qëllimi i ligjeve që duhet zbatuar, e jo interpretuar sipas dëshirës e për qëllime politike