Mali i Zi shpreson se rusët mund t’ua shpëtojnë sezonin turistik

Plazhet përgjatë brigjeve të Adriatikut të Malit të Zi, të mbushura normalisht me turistë në gusht, ishin kryesisht bosh javën e kaluar, e kjo për shkak të pandemisë së koronavirusit që po dëmton ekonominë e vendit.

Të ardhurat nga sezoni turistik i verës pritet të ulen me rreth 90% nga 280 milion euro (330 milion dollarë) në vitin 2019. Turizmi përbën më shumë se 20% të ekonomisë së Malit të Zi.

Në bregdetin e Budvës shihen kafet me shumë pak njerëz dhe larg njëri-tjetrit. Restorantet janë të boshatisura.

“Qarkullimi tani është rreth 12% në krahasim me të njëjtën datë të vitit të kaluar,”  tha Krsto Niklanovic, një pronar restoranti për Reuters.

Për të shpëtuar sezonin, Mali i Zi ,javën e kaluar hapi kufijtë për rusët, të cilët zakonisht përbëjnë një të tretën e 2.6 milion turistëve që vizitojnë çdo vit. Rusia duhet të miratojë masa reciproke përpara se turistët e saj të fillojnë të vijnë.

Lidhjet midis Podgoricës dhe Kremlinit u shkëputën pasi Mali i Zi u bashkua me NATO-n në vitin 2016, por rusët ende zotërojnë rreth një të tretën e të gjitha kompanive të huaja dhe pasurive të patundshme në vend.

Zeljka Radak-Kukavicic, kryetarja e Organizatës Turistike në Mal të Zi, tha se ardhja e rusëve do ta ndihmonte vendin.

“Unë besoj … ne do të arrijmë të paktën të minimizojmë efektet e shtatë muajve të mëparshëm,” tha ajo.

Mali i Zi në mars mbylli kufijtë, aeroportet dhe portet detare, dhe ndaloi tubimet publike dhe aktivitetet në natyrë.

Deri më tani vetëm 3,618 njerëz janë infektuar me koronavirus dhe 64 kanë vdekur.