Mbledhja e kryesisë së Kuvendit, bëhet ndarja e komisioneve

Gjatë ditës së sotshme Kryesia e Kuvendit mbajti një mbledhje, ku morën vendim që të enjtën nga ora 10:00, Kuvendi i Kosovës të mbaj një seancë plenare për të shqyrtuar propozimet e Kryesisë.

Po ashtu në këtë mbledhje, është bërë ndarja e komisioneve mes grupeve parlamentare, transmeton Indeksonline.

Sipas formulës së përcaktuar, LVV do të udhëheq tri komisione, LDK po ashtu tri komisione.

Grupi parlamentar i PDK-së do të udhëheq tri komisione, AAK dy komisione, ndërsa NISMA vetëm një.

Më poshtë keni komunikatën e plotë nga mbledhja e sotme:

Të enjten, më 13 shkurt 2020, në orën 10:00, Kuvendi i Republikës së Kosovës do të mblidhet në seancë plenare, për të shqyrtuar propozimin e Kryesisë së Kuvendit për themelimin dhe funksionalizimin e komisioneve parlamentare.

Kështu vendosi Kryesia e Kuvendit të Republikës së Kosovës, në mbledhjen e sotme, të drejtuar nga Vjosa Osmani, kryetare, në të cilën morën pjesë edhe kryetarët e grupeve parlamentare.

Konform vendimit të mbledhjes së kaluar, në mbledhjen e sotme u bë ndarja midis grupeve parlamentare e 14 komisioneve, sipas formulës së përcaktuar dhe të praktikuar në legjislaturat e kaluara.

Kështu, grupi më i madh parlamentar, ai i Lëvizjes Vetëvendosje, do të udhëheq tri komisione: Komisionin për Buxhet dhe Transfere, Komisionin për Bujqësi, Pylltari, Zhvillim Rural, Infrastrukturë dhe Mjedis dhe Komisionin për Çështjet e Sigurisë dhe Mbrojtjes.

Tri komisione do t’i drejtojë edhe Grupi Parlamentar i LDK-së: Komisionin për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit, Komisioni për Integrim Evropian dhe Komisionin për Arsim, Shkencë, Teknologji, Inovacion, Kulturë, Rini dhe Sport.

Grupi Parlamentar i PDK-së, i cili nuk kishte përfaqësues në mbledhjen e sotme, pritet të kryesojë Komisionin për Qeverisje Lokale, Zhvillim Rajonal dhe Media, Komisionin për Mbikëqyrjen e Financave Publike dhe Komisionin për Mbikëqyrjen e Agjencisë së Kosovës për Inteligjencë.

Grupi Parlamentar i AAK-së do të ketë nën udhëheqjen e vet dy komisione: Komisionin për Punë të Jashtme dhe Diasporë dhe atë për Shëndetësi dhe Mirëqenie Sociale, ndërsa GP i Nismës Socialdemokrate do të kryesojë Komisionin për Ekonomi, Punësim, Tregti, Industri, Ndërmarrësi dhe Investime Strategjike.

Komisioni për të Drejtat dhe Interesat e Komuniteteve dhe Kthim do të drejtohet nga GP i Listës serbe, ndërsa ai për të Drejtat e Njeriut, Barazi Gjinore, Persona të Pagjetur dhe Peticione, nga GP 6+.

Kryetarja Osmani bëri të ditur se fushëveprimi e komisioneve do të harmonizohet konform këtij propozimi.

Në mbledhjen e sotme, Kryesia shqyrtoi edhe çështje të tjera nga fushëveprimtaria e saj.