11:33 / E Mërkurë, 29 Janar 2020

Meliza, Kurtit: S’ta falim ta trajtosh Kosovën si shtet në mbikëqyrje!

Këshilltarja e kryeministrit në detyrë Haradinaj, Meliza Haradinaj-Stublla ka disa porosi për Albin Kurtin. Ajo i ka thënë liderit të Vetëvendosjes së Kosova nuk është protektorat dhe se nuk i falet që të trajtohet Kosova si shtet në mbikëqyrje.

“Ishte historike përfundimi i mbikqyrjes ndërkombëtare të Kosovës me shpalljen e pavarësisë me 17 shkurt 2008, përfundimi i mandatit të ICO-së në shtator 2012, dhe së fundmi përfundimi i mandatit të EULEX-it në qershor të vitit 2018.

Përkujtojani dikush Albinit, se Kosova tanimë është shtet në marrëdhënie partneriteti me komunitetin ndërkombëtar, jo në marrëdhënie mbikqyrëse. Kosova sot nuk është më konsumuese, por kontribuese e komunitetit ndërkombëtar.

Përkujtojani Albinit që derisa ai zhagitej herë në trenerka e pizhama, e herë në kat tesha, herë duke sulmuar institucionet e herë duke sulmuar ndërkombëtarët, herë duke flirtuar me ekstremistët fetar, e herë duke u shtirur si shqiptar i devotshëm me shqiponjë dykrenare, Kosova u bë shtet. Kosova u bë e pavarur. Kosova u bë partnere e botës. Dhe po kjo Kosovë, ta dha mandatin kushtetues për formim të qeverisë. Sot, NUK TA FALIM ta trajtosh Kosovën si shtet në mbikqyrje. Vetëvendosjen trajtoje si të duash. Kosovën ruaje ashtu si e gjete, dhe forcoje sa më shumë po munde e dite. Mundësinë e ke të bëhesh kryeministër. Merre sepse ta dha populli. Mos ik, mos u fsheh prapa syzeve të diplomatëve.

E përsëris: refuzimi i qëllimshëm i moskrijimit të qeverisë do të mbetet njollë e pashlyeshme e historisë politike të Vetëvendosjes si parti, dhe Albinit si politikan. Shans tjetër si ky nuk do të ketë”, shkruan Haradinaj-Stublla në Facebook.