18:49 / E Martë, 05 Shkurt 2019

Mjeku në Prizren e ofendon me fjalë të rënda pacienten, ajo po qante nga dhimbjet e sëmundjes

Si pasojë e dhimbjeve të mëdha të barkut, pacientes me inicialet V.Q iu desh që të kërkonte ndihmë mjekësore në Spitalin e Prizrenit.

Këto dhimbje u konstatua se kanë ardhur nga sëmundja e ‘Apendesit’ apo njohur ndryshe si ‘Zorra Qorre’.

Për t’u futur në operacion, pacientes iu desh të duronte dhimbjet për disa orë, pasi kirurgu i cili gjendej në atë kohë në Klinikën Kirurgjike nuk pranonte ta operonte, e gjithë kjo sipas pacientes dhe familjarëve të saj, në kërkim të parave.

Familjarët e pacientes thonë për Indeksonline se u detyruan që t’i jepnin doktorit në fjalë 200 euro, si mundësi për t’u futur në operim.

Përderisa pacientja po rënkonte nga dhimbjet e mëdha, sipas familjarëve britma e pacientes ishte pengesë për doktor Ymerin.

Gjersa pacientja dëgjohet duke qajtur nga dhimbjet, në audion e siguruar nga Indeksonline dëgjohet doktori duke ofenduar me fjalë të ndryshme, ndërsa në një moment e quan atë edhe idiote.

 “Punë e madhe që ke dhimbje , mos më shurdho shumë, mos u bë idiote, shuj. Ik aty majmun, se po ta dho një shuplakë. Stë vjen marre , shuj, mbylle gojën, mbylle”, ishin vetëm disa prej fjalëve që doktori i tha pacientes.

Dikush që qëndronte në dhomën e njëjtë nuk ka hezituar që të incizojë atë përderisa po ofendonte pacienten V.Q.

Indeksonline ka kontaktuar edhe kirurgun në Spitalin e Prizrenit,Rrahim Ymeri.

Ai ka kundërshtuar një gjë të tillë, duke thënë se janë pallavra.

“Çfarë video bre s’ka unë jam i moshuar po çfarë video. Pallavra janë ato , pallavra”, ishin fjalët e doktorit i cili fliste me zë të lartë dhe në fund e mbylli telefonin.

Indeksonline ka siguruar edhe dokumentacionin që tregon datën e shtrirjes së pacientes, daljen e saj, dhe gjendjen në të cilën ajo ishte dërguar në Klinikën Kirurgjike të Spitalit të Prizrenit./Indeksonline/