Në Prizren hapet Muzeu Lëvizës “Tirana vjen tek ti”

Me rastin e 100-vjetorit të shpalljes së Tiranës si kryeqytet të Shqipërisë në qytetin historik në Prizren është hapur Muzeu Lëvizës –“Tirana vjen tek ti”. Përmes këtij aktiviteti synohet promovimi turistik i Tiranës.

Aktivitetet për shënimin e këtij përvjetori fillimisht nisi me një takim në mes të përfaqësuesve nga bashkia e Tiranës dhe kryetarit të komunës së Prizenit, Mytaher Haskuka.

Gjatë hapjes se muzeut lëvizës “Tirana vjen tek ti”, nënkryetarja e Bashkësisë së Tiranës, Anuela Ristani tha se në këtë 100 vjetor vendosën që historinë e Tiranës ta sjellin në vendet me të afërta.

Ajo tha se pandemia ndikoi që shqiptarët në vend që të udhëtonin drejt vendeve tjera të zbulonin thesare të çmuara që i ka toka shqiptare.

Ristani tha se nisja e aktivitetit të muzeut lëvizës në Prizren ishte nisje e mbarë.

“Na shërbeu që përpara se ta bëjmë bitën që të di më shumë për ne, le të dimë më shumë ne rreth njëri-tjetrit. Ishte një mundësi fantastike që të sillnim Tiranën, historinë e saj atë që ofron por edhe të mësonim nga të gjitha vendet ku do të shkojmë dhe për t’i treguar secilit nga qytetet tjera që janë pjesë e shoqatës apo në këtë Ballkanin tonë ku flasim shqip se ku janë disa vende miqësore dhe destinacione ku me të vërtetë kalohet mirë, mëson diçka”, tha ajo.

Drejtoresha ekzekutive e Unionit të Bashkive Shqiptare të Rajonit, Adriola Kambo tha se “Tirana vjen tek ti” është një projekt që synon promovimin e turizmit të kryeqytetit shqiptar.

“Është një projekt që në koncept është turistik që ne të promovojmë njëri-tjetrin dhe t’i japim mundësi njëri-tjetrit që të festojmë por edhe të promovojmë”, tha Kambo.

Ndërsa, ambasadori i Shqipërisë në Kosovë, Qemal Minxhozi këtë nismë e ka konsideruar si veçantë dhe kërkoi që të bëhet traditë pasi kjo siç tha ai nuk do ndikoj vetëm në aspektin turistik por edhe në atë historik dhe vëllazëror.

“Kjo nismë e sotme që është marr në kuadër të Unionit të Bashkive të Rajonit të vlejë për një thellim të mëtejshëm për një gjëmtim më të thellë të Prizrenit të bukur i cili nuk ka vetëm këngë dhe lumenj por ka edhe një histori të larmishme që duhet studiuar nga secili prej nesh”, tha ambasadori shqiptar.

Kryetari i komunës së Prizrenit, Mytaher Haskuka tha se qëllimi i këtyre aktiviteteve është shkëmbimi kulturor si dhe promovimi i turizmit të Prizrenit dhe Tiranës.

Ai tha se trashëgimia kulturore e Prizrenit vizitohet shumë nga tiranasit prandaj e vlerësoi të nevojshme intensifikimin e bashkëpunimit.

“Ky projekt faktikisht ne kemi biseduar se do zhvillojmë shumë aktivitete brenda nga Unioni I Bashkive Shqiptare, ku një nga qëllimet kryesore është shkëmbimi kulturor por në të njëjtën kohë është edhe aspekti turistik që t’i promovojmë qytetet tona. Të promovojnë në këtë kohë kur pandemia i ka mbyllur kufijtë , dhe ka bllokuar sidomos turizmin. Në atë aspekt ne si komunë e Prizrenit e ka prioritet çështjen e prezantimit kulturor të trashëgimisë kulturore e kemi një nga prioritet që ndikon edhe në turizmin për qytetin tonë, tha Haskuka.

Delegacioni nga Tirana i kryesuar nga nënkryetarja e Bashkësisë së Tiranës, Anuela Ristani dhe të shoqëruar nga kreu i Prizrenit, Mytaher Haskuka sot kanë vizituar edhe panairin e artizanaleve në qytet, parkun e inovacionit dhe trajnimeve si dhe çerdhen publike “11 marsi” në Prizren.

Muzeu lëvizës “Tirana vjen tek ti” do të prezantohen nesër në Gjakovë, më pas edhe në Pejë dhe aktiviteti i fundit do jetë në Prishtinë.