Nga zjarri në Gjykatën Themelore në Pejë nuk janë dëmtuar lëndët
Mbrëmë, një pjesë e Gjykatës Themelore në Pejë, është kapluar nga zjarri, përcjellë Indeksonline.
Nga ky zjarr përveç pajisjeve teknike, nuk kanë dëmtuar lëndët.
Këtë e ka bërë të ditur përmes një komunikate për media, Gjykata Themelore në Pejë.
Sipas kësaj komunikate, zjarri ka përfshirë një pjesë të përdhese së objektit, përkatësisht në Zyrën e Shkrimores Civile.
Po ashtu deri në pastrimin e kësaj pjesë, Gjykata në Pejë nuk do të jenë në shërbim të qytetarëve, përveç rasteve emergjente.
Më poshtë gjeni edhe komunikatën e plotë:
Ju informojmë se mbrëmë, rreth orës 23:15, zjarri ka kapluar një pjesë të përdheses së objektit të Gjykatës Themelore në Pejë, më saktësisht Zyrën e Shkrimores Civile.
Ekipi i zjarrfikësve dhe policia kanë dalë menjëherë në vendin e ngjarjes me çka është lokalizuar zjarri, janë ndërmarrë masat e nevojshme dhe zjarri është shuar. Si pasojë e zjarrit ka pas dëme materiale në pajisje teknike përfshirë kompjuterë, printer si dhe tavolina dhe karrige. Lëndët që kanë qenë nëpër dollapë nuk janë dëmtuar. Të vetmet lëndë që zjarri i ka prekë kanë qenë disa lëndë me Kërkesa për Shlyerje të Dënimeve si dhe Regjistri i këtyre lëndëve por lëndët bazike të këtyre kërkesave nuk janë dëmtuar pasi që të njëjtat gjenden në arkivin e gjykatës.
Shkaku i zjarrit është aksidental për të cilën është bërë edhe hetimi nga ana e zjarrfikësve dhe policisë të cilët do të dalin me raportin e tyre përfundimtar lidhur me këtë rast.
I sigurojmë qytetarët të cilët kanë procedura të hapura civile në Gjykatën tonë se lëndët e tyre nuk janë përfshirë nga zjarri dhe nuk janë të dëmtuara andaj, edhe proceset gjyqësore do të vazhdojnë të zhvillohen në mënyrë të rregullt.
Fatmirësisht, dëmet e shkaktuara janë të natyrës materiale dhe jo shumë të mëdha. Gjykata nuk do të jetë në shërbim të qytetarëve për disa orë në ditën e sotme deri në pastrimin e saj por që kërkesat urgjente do të pranohen. Gjykata do të vazhdojë punën e saj normale pas pastrimit të Gjykatës. Për këtë kërkojmë mirëkuptimin e qytetarëve.