Obama, për Mueller: Njeriu që forcoi ligjin dhe shpëtoi jetë pas 11 shtatorit

Ish-presidenti i Shteteve të Bashkuara, Barack Obama, ka reaguar pas lajmit për ndarjen nga jeta të ish-drejtorit të FBI-së, Robert Mueller, duke e cilësuar atë si një nga figurat më të rëndësishme në historinë e institucioneve amerikane.

Në një postim publik, Obama theksoi se Mueller ishte ndër drejtorët më të mirë në historinë e FBI-së, duke nënvizuar rolin e tij në transformimin e këtij institucioni pas sulmeve terroriste të 11 shtatorit 2001.

“Bob Mueller ishte një nga drejtorët më të shkëlqyer në historinë e FBI-së, duke transformuar byronë pas 11 shtatorit dhe duke shpëtuar jetë të panumërta. Por ishte përkushtimi i tij ndaj ligjit dhe besimi i tij në vlerat tona që e bënë një nga shërbyesit publikë më të respektuar,” u shpreh Obama.

Së bashku me bashkëshorten e tij, Michelle, Barack iu shprehi ngushëllimet familjes së Mueller dhe të gjithë atyre që e njohën dhe e vlerësuan atë.

Ky është postimi i plotë i tij:

Bob Mueller ishte një nga drejtorët më të shkëlqyer në historinë e FBI-së, duke e transformuar byronë pas 11 shtatorit dhe duke shpëtuar jetë të panumërta. Por ishte përkushtimi i tij i palodhur ndaj sundimit të ligjit dhe besimi i tij i palëkundur në vlerat tona themelore që e bënë atë një nga shërbyesit publikë më të respektuar të kohës sonë. Michelle dhe unë i shprehim ngushëllimet tona familjes së Bobit dhe të gjithë atyre që e njohën dhe e admiruan atë.