Osmani i shkruan Hotit, i kërkon raportim në Kuvend lidhur me menaxhimin e pandemisë

Kryetarja e Kuvendit të Kosovës, Vjosa Osmani i është drejtuar me një letër sot kryeministrit të Kosovës, Avdullah Hoti ku i kërkon që të vie në Kuvend për të raportuar lidhur me menaxhimin e pandemisë COVID-19.

Në letrën të cilën e ka siguruar Telegrafi, Osmani ka kërkuar nga Hoti që në ditët në vijim por jo më vonë se një javë, ta njoftoi Kuvendin lidhur me ditën dhe kohën e raportimit.

“Në mbledhjen e fundit të Kryesisë së Kuvendit, ndër të tjera kemi shprehur shqetësimin tonë lidhur me zhvillimet e fundit rreth menaxhimit të pandemisë në vend. Pas konsultimit me anëtarët e kryesisë, njëzëri jemi dakorduar që t’u ftojmë për raportim në Kuvendin e Republikës së Kosovës lidhur me këtë çështje.

Prandaj në emër të Kryesisë së Kuvendit, ju ftoj për raportim në Kuvend në mënyrë që ta njoftoni Kuvendin, lidhur me të gjitha veprimet e Qeverisë së Republikës së Kosovës rreth menaxhimit dhe parandalimit të pandemisë”, thuhet në letrën e Osmanit drejtuar Hotit.

Ndryshe mbrëmë IKSHPK-ja njoftoi edhe për 195 raste të reja me COVID-19 në vend.

Deri më tash numri i të infektuarave ka arritur në 3,703 ku prej tyre janë shëruar 1,946 kurse 79 të tjerë kanë humbur jetën.