Për dhjetë muaj, rreth 5 mijë qytetarë të Kosovës hoqën dorë nga shtetësia

Mundimi për t’u pajisur me një vizë, mosliberailizimi, rrethanat politike, sociale, ekonomike e personale, janë vetëm disa nga arsyet pse çdo vit, mijëra qytetarë të Kosovës heqin dorë nga shtetësia e Kosovës.

Vetëm pesë vitet e fundit,  mbi 30 mijë qytetarë të Kosovës kanë aplikuar në Ministrinë e Punëve të Brendshme që mos të figurojnë më si qytetarë të Republikës së Kosovës, shkruan Indeksonline.

Sipas statistikave që posedon kjo ministri, pothuajse çdo vit, mbi 5 mijë qytetarë të Kosovës heqin dorë nga shtetësia.

Drejtoresha e zyrës për informim në MPB, Rroksana Qarri ka thënë për Indeksonline se deri në tetor, rreth 5 mijë persona kanë bërë kërkesa të tilla.

“Gjatë periudhës Janar-Tetor 2018 nga shtetësia e Republikës së Kosovës janë liruar  4831 persona. Prej tyre, 2322 janë femra dhe 2509 meshkuj”, ka theksuar Qarri.

Ajo ka përmendur disa nga arsyet me të cilat aplikantët e marrin një vendim të tillë të rëndësishëm.

“Arsyeja e heqjes dorë nga shtetësia e Republikës se Kosovës vjen si rezultat i fitimit të shtetësisë së ndonjë vendi kryesisht të  Bashkimit Evropian i cili nuk lejon dy shtetësi për shtetasit e shteteve që nuk janë pjesa e Bashkimit Evropian”, ka thënë tutje Qarri.

Për dallim nga heqja dorë nga shtetësia, numër shumëfish më i vogël kanë aplikuar për t’u pajisur me shtetësinë e Republikës së Kosovës.

Sipas Qarrit, gjatë periudhës janar-tetor 2018,shtetësinë e Republikës së Kosovës e kanë fituar 298 persona, shqiptare  – 200; serbe  – 12; turke –  5 dhe te tjera – 81.

Kujtojmë se qytetarë në numër të madh për heqje nga shtetësia aplikuan edhe viteve të kaluara.

Kështu, numri i personave që janë liruar nga shtetësia e Republikës së Kosovës ndër vite ishte:

2013     –       5177

2014     –       5157

2015     –       5537

2016     –       5871

2017      –       5699. /Indeksonline/