Përpos Bastonit, Barça interesohet edhe për një yll të Serie A

Barcelona e ka identifikuar Alessandro Bastonin si qendërmbrojtësin kryesor për merkato verore, dhe aktualisht shanset që lojtari i Interit të përfundojë te “Spotify Camp Nou” janë relativisht të larta.

Por duket se ai mund të mos jetë i vetmi mbrojtës i Serie A që do të bashkohet me katalanasit në 2026.

Përveç qendërmbrojtësit të ri, Barcelona po shqyrton mundësinë e nënshkrimit të një mbrojtësi tjetër krahu.

Në rast se João Cancelo nuk qëndron në mënyrë të përhershme, skuadra do të kishte pak zgjedhje – veçanërisht në krahun e djathtë, ku nuk do të kishte një opsion natyral për të zëvendësuar Jules Koundé.

Këtu hyn në lojë Marco Palestra. Sipas raportimeve të Nicolo Schira, dhe të konfirmuara nga “MD”, Barcelona ka skautuar së fundmi 21-vjeçarin, i cili aktualisht luan me huazim te Cagliari nga Atalanta.

Palestra është një talent në ngritje në Itali dhe gjatë pushimit të fundit ndërkombëtar bëri dy paraqitjet e tij të para me kombëtaren “Azzurri”.

Në rast se katalanasit vendosin të forcojnë interesin për Palestrën, ata do të përballen me konkurrencë të madhe nga klube evropiane.

Liverpooli është i interesuar, ndërsa Inter raportohet se ka planifikuar 35 milionë euro për një transferim të mundshëm – dhe kjo nismë mund të financohet nga Barcelona nëse firmos Bastonin.