Policia hedh poshtë lajmet e mediave serbe për autoblinda në veri

Presidenti i Serbisë, Aleksander Vuçiq në një takim me përfaqësuesit serb ka deklararuar se Beogradi ka informata se trupat shqiptare nga baza në Belevedere dhe Vrellë janë nisur në drejtim të veriut të Mitrovicës.

Kjo deklaratë ishte e mjaftueshme për të raportuar mediat serbe së tashmë në veri kanë arritur edhe autoblinda.

Por të gjitha këto deklarata i ka mohuar zëvendësdrejtori i Policisë në Veri, Besim Hoti.

Ai për Indeksonline ka thënë se situata në veri është e qetë dhe nuk ka asgjë.

“Nuk ka asgjë në lidhje me këto deklarata”, ka thënë shkurt Hoti.

Rikujtojmë që ditën e djeshme Qeveria e Kosovës ka marr vendim që të vendoset masa prej 100 përqind për produktet nga Serbia dhe Bosnja dhe Hercegovina. Vendim ky që ka shtyrë palën serbe të reagoj menjëherë, madje edhe me një konferencë për media në mesnatë.

Presidenti serb Vuçiq ka thënë se masa 100 përqind është i padrejtë dhe rrjedhimisht do të pamundësonte qarkullimin e mallrave serbe në Kosovë, teksa ka lutur institucionet e shtetit të Kosovës të heqin dorë nga ky vendim./Indeksonline/