Prestigjiozja “Fodors”: Shqipëria, vendi më tërheqes mesdhetar

Guida prestigjioze e udhëtimeve në botë, “Fodors”, e ka renditur Shqipërinë në listën e vendeve mesdhetare më tërheqëse për vitin 2020.

Kjo guidë ka publikuar dy lista atë të vendeve ku nuk duhet shkuar dhe atë të vendeve ku duhet shkuar më 2020. Shqipëria është listuar në vendet që duhet të shkuar e madje cilësohet si vendi mesdhetar më tërheqës për 2020-n.

Shqipëria renditet nga prestigjiozja “Fodors”, e dyta në listën e destinacioneve që duhet të vizitohen për vitin 2020 pas ishujve të Sicilisë, duke lënë pas Athinën, Bukureshtin, Ishujt Faroe, Andaluzinë në Spanjë dhe Britaninë.

“Liqenet e saj malore, pyjet magjepsëse dhe kultura e pasur e bëjnë këtë vend jo shumë të populluar bregdetar destinacionin më të nxehtë mesdhetar për vitin 2020”, kështu e nis shkrimin për Shqipërinë “Fodors”-i.

“E vendosur përgjatë deteve Adriatik dhe Jon, Shqipëria ka një pozicion mahnitës në Mesdhe. Malet në veri janë shtëpi për disa nga liqenet më të bukur në Evropë, përfshirë Liqenin ngjyrë smerald të Komanit dhe Liqenin e kristaltë të Ohrit, ndërsa vija bregdetare është e rrethuar nga plazhet me rërë të bardhë që mbeten freskuese dhe gjatë sezonit të pikut turistik dhe në brendësi të vendit gjenden qytete të vogla të tipit mesdhetar si Gjirokastra, që është shpallur si zonë e trashëgimisë botërore”, shkruan prestigjiozja e udhëtimeve në botë, “Fodors”-i.

“Pushimi i kafesë në Shqipëri zgjat me orë dhe ndodh gjatë të gjitha orëve të ditës, ku kafenetë mbushen me shokë e kolegë, të cilët e shijojnë kafenë në stilin turk “avash-avash”, mbyllet shkrimi për vendin tonë.