Rrëfimi rrëqethës i motrës së shqiptarit të masakruar në Francë

25-vjeçarja Beqiraj e cila prej 7 vitesh jeton në Mal të Zi me familjen e saj, tregon se Florenci ishte nisur prej 2 vitesh në Francë, ku qëndronte në një banesë në Marsejë me një tjetër shqiptarë.

“Dadë, më kanë kapur se më kanë mbaruar letrat e azilit, jam brenda”, janë fjalët e fundit që Florenci i tha të motrës që e ka rritur, në një telefonatë teksa ishte ndaluar nga policia. Djali duket se e ka parandjerë fatin e tij, pasi të motrës i është shprehur se në burg nuk janë aspak njerëz të mirë.

“I thash: Rri me dikë të njohur. Ai më tha: Këtu brenda nuk ka njerëz të mirë. Dhe qysh atë ditë se kam dëgjuar më’, tregon ajo për Express.

Ditë më parë në një burg të Marsejës, 23-vjeçari Florenc Beqiraj është nxjerrë i masakruar me shenja në duar dhe një shenjë në fyt, dhe më tej është transportuar në spital, ku mjekët i kanë thënë familjes se djali ndodhet në vdekje klinike. Familja që jeton në kushte të mjerueshme, thotë se e ka pasur të vështirë të mësojë për fatin e Florencit edhe për faktin se nuk kanë njohuri në gjuhë të huaj, anglisht apo frëngjisht. Por përmes një kushërirës së tyre në Francë, ata kanë mësuar nga policia se Florenci ka vdekur.

“E kam telefonuar numrin nga më mori Florenci dhe më është përgjigjur polici, s’më ka thënë asgjë. Ndërkohë kushërira në Francë e telefonon dhe i thanë ‘Florenci ka vdekur”. Si vdiq Florenci në duart e Shtetit?! Të gjithë na mbyllnin telefonin, s’na jepnin sqarime. Shoqëria e tij na thanë që është në spital”, tregon ajo teksa nuk mban dot lotët.

Ndërsa zyrtarisht nga ambasada shqiptare i është thënë se djali i tyre ka vrarë veten në burg, duke u varur me litar.

“I kemi shkruar ambasadës shqiptare. Na kanë thënë se Florenci ka tentuar vetëvarje, ka shumë pak shpresa për jetën është mirë të jenë familjarët pranë tij”, – tregon ajo për shkresën zyrtare që i ka mbërritur familjes nga ambasada. Ajo flet edhe për një skandal gjatë kohës kur babai i saj ka mbërritur në Francë, kur nga ambasada i janë përgjigjur: “Nuk kemi kohë për t’ju takuar, jemi në Paris”.

Por për motrën e tij ky fakt tronditës i vetëvrasjes kurrsesi nuk mund të jetë i vërtetë dhe se pas kësaj ngjarje fshihet një tjetër version i rëndë. 25-vjeçarja fajëson shtetin francez dhe policinë për atë që i ka ndodhur vëllait.

“Ja kanë bërë në burg djalit. Asnjë njeri normal nuk mund t’ja bëjë vetes atë. Djali ka shenja në dorë në krah, dhe i lidhur në fyt, njeriu nuk mund me tentu vetëvrasjen në atë mënyrë. Ai është trup i nxehtë nuk është i vdekur, ata nuk ja japin mjekimin e duhur. Ata duan të mbyllin punët e veta. Unë e njoh shumë mirë ai s’ka qenë problematik ka shkuar për bukën e gojës”, rrëfen motra e Florencit.

Spitali i ka vendosur tubat e oksigjenit dhe i riu mbahet në reaminacion. Spitali kërkoi praninë e një pjesëtari të familjes, që të firmosë për heqjen e tubave të oksigjenit. Por deri më tani familja Beqiraj është kundër këtij vendimi dhe e pret Florencin t’i kthehet gjallë në shtëpi. Për këtë kërkon edhe ndihmën e shtetit shqiptar.

“E kam rritur me sakrifica që zoti e din. Du me ma pru prap gjallë këtu. Zbardhja e fatit është në duart e shtetit”, thotë e motra për Express.

Motra rrëfen edhe një skenë rrëqethëse por që nga ana tjetër jep shumë shpresë:

“Babait kur e ka parë në spital i është dukur sikur Florenci ka buzëqeshur dhe i ka pikuar loti prej syrit”.

Sipas saj, Florenci është një djalë shembullor, dhe kurrë nuk ka pasur konflikte me asnjë person. Ai punonte për 20 euro – tregon ajo duke rrëfyer mes lotësh sakrificat mes të cilave ajo ka rritur vëllain e saj që tashmë po lufton me vdekjen.