Thaçi e Haradinaj dënojnë sulmin ndaj Vehbi Kajktazit
Presidenti i vendit, Hashim Thaçi dhe kryeministri, Ramush Haradinaj kanë dënuar sulmin fizik ndaj gazetarit Vehbi Kajtazi që ndodhi sot në Prishtinë.
“Si shoqëri s’duhet të lejojmë që dhuna të bëhet mjet i shprehjes së pakënaqësisë sonë apo i zgjidhjes së problemeve që mund t’i kemi. Është krejtësisht i papranueshëm dhe i dënueshëm përdorimi i dhunës ndaj gazetarëve”, ka shkruar Thaçi në Facebook, transmeton AktivPress.
“Puna e tyre, liria e medias, liria e shprehjes, janë vlera demokratike mbi të cilat ne po e ndërtojmë shoqërinë tonë”, ka shtuar i pari i shtetit.
Ndërkaq kryeministri Haradinaj ka thënë se sulmi ndaj gazetarit është i papranueshëm.
“Si Qeveri jemi zotuar për një bashkëpunim me medie, për të qenë transparent, dhe për t’i dhënë mundësi fjalës së lirë, mendimit të lirë, pikëpamjet e secilit për të ardhur në shprehje”, ka thënë kryeministri.
Gazetari Vehbi Kajtazi, është sulmuar sot fizikisht në qendër të Prishtinës rreth orës 14:30 në një nga lokalet në kryeqytet. Policia ka arrestuar Faton Ramadanin, si të dyshuar për sulmin./AktivPress