“Vdiqën ngadalë”, si u mbyllën në “arkivolin metalik” 39 emigrantët, që ngrinë në kamion

Policia britanike tha se kamioni, ku janë gjetur 39 trupa të pajetë, mëngjesin e së mërkurës, besohet se kishin hyrë në Britani nga Belgjika. Më herët, autoritetet thanë se ai mund të kishte hyrë nga porti në Uells, që është një pikë kryesore për trafikun nga Irlanda.

Trupat, 38 të rritur dhe një adoleshent u gjetën në parkun industrial “Waterglade”, rreth 32 kilometra larg Londrës. Policia tha se ka arrestuar drejtuesin e dyshuar të kamionit.

Mediat britanike e identifikuan atë si Mo Robinson, 25 vjeç, nga Irlanda Veriore.

Ministria e Jashtme e Bullgarisë, nga ana tjetër, konfirmoi se kamioni është i regjistruar në qytetin bullgar Varna, në një kompani të një gruaje nga Irlanda.

Megjithatë, kryeministri bullgar, Boyko Borissov, tha se personat e gjetur të vdekur në kamion nuk kanë hyrë në të në Bullgari, sepse automjeti nuk ka qenë atje prejse është regjistruar në vitin 2017. Borissov tha se Bullgaria po bashkëpunon me autoritetet britanike në hetime.

Policia britanike tha se nuk i ka identifikuar ende viktimat. Ajo nuk dha detaje se sa nga to janë burra ose gra.

Kryeministri britanik, Boris Johnson, tha se incidenti është një “tragjedi e paimagjinueshme” dhe “vërtet zemërthyese”.