Vjen reagimi i parë pas shkarkimit të prorektores së UP-së
ORCA përgëzon Këshillin Drejtues për vendimin e sotëm për shkarkimin e prorektores Teuta Pustina-Krasniqi për shkak të provokimit me gjuhë seksiste nga ana e saj, duke thënë se kjo është edhe një fitore e aktivizimit studentor në Universitetin e Prishtinës.
ORCA ka mbështetur grupet studentore në aksionin simbolik dhe ka mbështetur kërkesat e tyre drejtuar Universitetit të Prishtinës.
“Shkarkimi i prorektores Pustina është hapi i parë drejt çrrënjosjes së gjuhës seksiste, ngacmimeve seksuale dhe mizogjinisë në Universitetin e Prishtinës”, thuhet në deklaratë.
ORCA i bën apel Këshillit Drejtues që të vazhdojë me përmirësimin e Kodit të Etikës për Personelin Akademik dhe kristalizimin e dispozitave dhe ndëshkimeve për ngacmimet seksual.
ORCA po ashtu pret nga UP që të kërkojë falje publike për provokimin e prorektores Pustina-Krasniqi, e cila fajësoi viktimat e ngacmimit seksual.
Me këtë rast ORCA i bën thirrje të gjithë personave që kanë përjetuar ngacmim seksual në ambientet e Universitetit të Prishtinës ta raportojnë atë tek organet përgjegjëse.