VV: Jusufi, Bardhoshi e Kadriu, ende vazhdojnë të na frymëzojnë mendjen

Në 38- vjetorin e rënies së tre dëshmorëve të kombit Jusuf e Bardhosh Gërvalla dhe Kadri Zeka, Lëvizja Vetëvendosje, në dy delegacione të veçanta bëri homazhe te Kompleksi Memorial i Vëllezërve Gërvalla, në Dubovik të Deçanit dhe te varri i Kadri Zekës te Kompleksi i Varrezave të Dëshmorëve në Gjilan.

Jusuf e Bardhosh Gërvalla dhe Kadri Zeka si veprimtarë të shquar të çështjes kombëtare u vranë nga shërbimi sekret jugosllav 38 vjet më parë në Shtutgart të Gjermanisë.

VV-ja nëpërmjet një komunikate thotë se vrasja e tyre, për të cilën ende nuk është hetuar apo dënuar dikush, kishte për qëllim goditjen e përpjekjes së popullit shqiptar për t’u organizuar e dalë nga robëria.

“Jusufi, Bardhoshi dhe Kadriu asokohe po bashkonin shqiptarët, organizatat e tyre dhe po frymëzonin jetën politike e kulturore duke ndërtuar një bazë të shëndoshë për një vetëdije më të lartë shoqërore e politike të shqiptarëve, andaj edhe u vranë nga regjimi jugosllav i dominuar nga Serbia në atë kohë. Jusufi, Bardhoshi e Kadriu ende vazhdojnë të na frymëzojnë mendjen e të na ngrohin zemrën me krijimtarinë që na e lanë. I përjetshëm do të jetë kujtimi për ta”, thuhet në komunikatë.