22-vjeçari kosovar dënohet me burgim të përjetshëm, në Gjermani, goditi për vdekje një grua teksa bënte gara

Një i ri nga Kosova është dënuar me burgim të përjetshëm pasi i mori jetën një gruaje teksa bënte gara në rrugët e Gjermanisë.

Gjykata e Landit në Kleve e konsideroi si vrasje humbjen e jetës së 43-vjeçares Sema. S. Kjo pasi makina e saj u përplas nga “Mercedezi” që drejtohej me shpejtësi tepër të lartë nga Kushtrim. H 22-vjeç. Kështu i riu nga Kosova mori dënimin maksimal, duke u mbyllur prapa hekurave për të gjithë jetën e tij.

Ndërkohë personi tjetër që po garonte me 22-vjeçarin shqiptar, edhe ai vetëm 22-vjeç i quajtur Ismail.S, me shtetësi gjermane mori një dënim prej 3 vjet e 9 muajsh heqje lirie.

Gara që shkoi keq midis kosovarit dhe gjermanit, u zhvillua në prillin e kaluar (2019) në zonën e tyre të banimit, në Moers afër Duisburgut. Gjermani drejtonte një makinë tip ‘Range Rover Sport’ me 550 kuaj fuqi, ndërsa shqiptari nga Kosova një “Mercdez AMG E63 S me 612 kuaj fuqi.

Pas humbjes së kontrollit nga shpejtësia e lartë, makina e Kushtrim.H ka përplasur makinën e 43-vjeçares gjermane duke e lënë të vdekur.

Në sallën e gjyqit të dy të akuzuarit e kanë pranuar se po bënin gara, por kjo nuk ka ndikuar në uljen e dënimit të tyre.

Në gjyq, shoferi i makinës, i cili nuk ishte përfshirë direkt në aksident, i ka kërkuar falje familjes së gruas së vrarë. Në një deklaratë të lexuar nga avokati i tij, ai thotë: “Më vjen së tepërmi keq për atë që ka ndodhur. Unë do të doja të zhbëhej kjo që ka ndodhur”.