Kastriot Rexha: Ky titull është i veçantë, ky është dallimi me titullin te Feronikeli

Drita dje u shpall kampion i Superligës pas barazimit 2-2 në midis Gjilanit dhe Ballkanit në javën e parafundit.

Kështu, Kastriot Rexha për herë të dytë radhazi fiton titullin e Superligës dhe për të katërtin vit radhazi merr nga një trofe në Kosovë.

Në një prononcim për Indeksonlinen, sulmuesi shtatlartë ka thënë se ky trofe është shumë i veçantë, duke e marrë parasysh rikthimin te Drita dhe lëndimet që e kanë përcjell.

“Ky titull është shumë i veçantë, duke marrë parasysh se rikthimi te Drita në formën më të mirë që kalova dhe lëndimi që pësova por gjithçka ka ecur mirë. Jam shumë i lumtur që për të katërtin vit radhazi fitoj trofe në Kosovë”, ka thënë Rexha.

Ai gjithashtu ka krahasuar titullin e fituar te Feronikeli sezonin e kaluar dhe atë te Drita këtë sezon.

“Edhe vitin e kaluar ka qenë me shumë sukses, mirëpo ky vit është diçka i jashtëzakonshëm pasi karakterizohet me pandemi dhe stërzgjatje. Ky ndoshta ka qenë më i vështiri për shkak të pandemisë”, ka shtuar sulmuesi.

Rexha këtë sukses ia ka dedikuar familjes së tij.

Sulmuesi i Dritës aktualisht është në pozitën e tretë në listën e golashënuesve me 13 gola. /IndeksOnline/