Musliu Shoshi-Hotit: Ti mund ta vazhdosh dialogun edhe sa për foto, por dështim do ta kesh rezultatin final

Deputetja e PDK-së, Ariana Musliu Shoshi gjatë adresimit të saj në Kuvend ku po raporton kryeministri i vendit Avdullah Hoti, për procesin e dialogut të Kosovës me Serbinë, ka kritikuar paraqitjen e fundit të kryeministrit takimin me presidentin serb Aleksander Vuçiq.

Sipas Musliu Shoshit, paraqitja e Hotit në këtë takim ishte nënshtruese, si dhe përgjigja e tij në gjuhë serbe ndaj pyetjes së Vuçiqit ishte një gabim diplomatik.

“ Dialogu duhet të zhvillohet sepse nuk kemi alternativ tjetër, por duhet të jetë në mes të të barabartëve. Por në rrethana të tilla në të cilat jemi, është e papërshtatshme që të dialogohet  me Serbinë. Por ju e vazhduat, paraqitja juaj në takim ishte tepër nënshtruese, pse pranoni të flisini serbisht? Pranuat që Lajçak të ulet në anën tjetër me Vuçiqin , pse nuk u ulë përball Borellit, në diplomaci kjo e vë Kosovë në pozitë të pabarabartë dhe ju pranuat këtë pozicion inferior ndaj Kosovës”, tha Musliu Shoshi.

Musliu Shoshi ka thënë tutje se Kosova është në një rrugë të errët sa i përket dialogut me Serbinë dhe se raportimi i Hotit në Kuvend nuk paraqet asgjë të re për ta si deputetë.

 Ajo ka kërkuar që për dialogun duhet të ketë unitet dhe përfshirje të ShBA-së, dhe se vetëm këto e mundësojnë një sukses të këtij dialogu maratonik.

“Dialogu pa garancë të ShBA-ve, pa platformë dhe strategji të qartë, pa konsensus të brendshëm dhe pa njohje të Republikës së Kosovës nuk duhet të vazhdohet. Ti mund ta vazhdosh edhe sa për foto por dështim do ta kesh rezultatin final”, tha ajo.